Çdo sezon sjell me vete jo vetëm ndryshime në mot, por edhe në mënyrën si përqafojmë ngjyrat. Paleta e kësaj vjeshte na sjell në një “udhëtim estetik”, ku tonalitetet e ngrohta takohen me intensitetin modern, duke e shndërruar çdo veshje në një formë të re shprehjeje dhe ripërtëritjeje personale.
Nga nuancat neutrale, deri te nuancat e theksuara që sjellin gjallëri, ngjyrat e këtij sezoni nuk janë thjesht pjesë e tendencave, ato premtojnë të bëhen pjesë e pandashme e gardërobës suaj për shumë më gjatë.
Zbuloni më poshtë tonet që përbëjnë paletën më të spikatur të vjeshtës 2025.
Tonet gri
Grija është rikthyer fuqishëm në pistat e këtij sezoni, duke rikonfirmuar statusin e saj si simbol i elegancës së heshtur. Palltot e gjata, trikotazhet e buta dhe siluetat monokromatike tregojnë se kjo ngjyrë nuk është aspak e mërzitshme, përkundrazi, një pamje “all-grey” mund të jetë po aq e guximshme sa edhe sofistikuar.
Blu
Si gjithmonë, tepër e rafinuar, bluja, nga tonet më të errëta deri te ato pastel, sjell një ndjesi qetësie në paletën e këtij sezoni. Kombinohet lehtësisht me nuanca neutrale si gri dhe kafe, por mund të shkëlqejë edhe në pamje monokromatike.
E gjelbra
Një nga befasitë më të këndshme të këtij sezoni është nuanca e gjelbër. Qoftë përmes një veshjeje të plotë, apo thjesht një detaji të vogël, kjo ngjyrë nuk kalon pa u vënë re.
Kafe
Ngjyra kafe vijon të jetë një nga zgjedhjet më të dashura të stinës. Me ngrohtësinë dhe neutralitetin e saj, ajo shfaqet si një alternativë më e butë, por po aq elegante sa e zeza, duke u kombinuar në mënyrë ideale me paletën natyrore të vjeshtës.
E kuqja
Nuk ka ngjyrë që përfaqëson më mirë pasionin dhe vetëbesimin sesa e kuqja. Këtë vjeshtë, ajo rikthehet në versionin e saj më të zjarrtë, ideale për të krijuar pamje të guximshme apo për të shtuar pak ngjyrë në një kombinim më neutral.
