Benny Blanco ka treguar se, para se të lidhej me Selena Gomez, kishte krijuar bashkë me terapistin një listë me cilësitë që kërkonte te partnerja ideale.
Producenti muzikor foli për këtë në podcastin “The Mel Robbins Podcast”, ku shpjegoi se kishte kërkuar ndihmë profesionale sepse dëshironte të gjente personin me të cilin do të kalonte pjesën tjetër të jetës.
“Doja të gjeja partneren e duhur dhe po bëja diçka gabim. Nuk po arrija të gjeja personin me të cilin do të kaloja pjesën tjetër të jetës”, tregoi Blanco, emri i vërtetë i të cilit është Benjamin Levin.
Sipas tij, terapisti i sugjeroi të shkruante se si do të ishte “partnerja ideale”. Kriteri i parë ishte që ajo të ishte në një moshë të përshtatshme, ndërsa i dyti lidhej me karakterin.
Blanco tha se kërkonte dikë “të dashur, të kujdesshme dhe të dhembshur”, pra një person që në thelb të ishte i mirë me të tjerët. Kriteri i tretë ishte që partnerja të ishte përgjithësisht e lumtur kur zgjohej në mëngjes.
Por për të, rëndësi kishte edhe mënyra se si një person përballej me momentet e vështira. Nëse ajo do të ishte e trishtuar, Blanco dëshironte që të ndërmerrte hapa për t’u ndier më mirë, qoftë përmes terapisë, medikamenteve kur nevojiteshin apo aktiviteteve si joga.
Producenti sqaroi se lista nuk kishte kritere të çuditshme apo sipërfaqësore, por fokusohej te cilësitë bazë që ai konsideronte të rëndësishme në një marrëdhënie.
Ai tregoi gjithashtu se kriteret e para ishin aq të rëndësishme, sa nëse një person nuk i plotësonte pesë ose gjashtë prej tyre, ai nuk do ta vijonte më tej njohjen.
Duke folur për marrëdhënien me Selena Gomez, 34 vjeç, Blanco tha se në fund gjithçka lidhej me momentin e duhur. Të dy ishin njohur rreth 15 vite më parë dhe kishin punuar bashkë disa vite më vonë, ndërsa për një periudhë të gjatë kishin ruajtur miqësi.
Më pas nisën të takoheshin dhe marrëdhënia evoluoi deri në martesë. Çifti u lidh publikisht në vitin 2023, njoftoi fejesën në dhjetor 2024 dhe u martua në Kaliforni në shtator 2025.
Blanco beson se lidhja e tyre nuk do të kishte funksionuar po të ishin takuar në një moment tjetër të jetës. Sipas tij, të dy duhej të ishin në një fazë ku ishin gati për atë marrëdhënie.
Në fund të muajit, Blanco pritet të publikojë edhe librin e tij të ri “F*ck Failure”, një ndërthurje mes autobiografisë dhe këshillave për përballimin e dështimit.
