Java e Modës së Lartë mund të ketë përfunduar, por rrugët e Parisit vazhdojnë të jenë një burim i pafund frymëzimi për modën. Sidomos gjatë verës, vajzat parisiane dinë si t’i bëjnë edhe veshjet më të thjeshta të duken të kuruara dhe interesante.
Këtë sezon, ato nuk po ndjekin domosdoshmërisht tendencat më të mëdha që shfaqen kudo. Përkundrazi, po i japin rëndësi disa detajeve më të vogla, të cilat mjaftojnë për ta ndryshuar tërësisht një veshje. Nga bluzat me basqe te këpucët me platformë dhe kapelet e vogla, këto janë gjashtë tendencat që po fitojnë terren në Paris këtë verë.
Çantat e kashtës
Nuk duhet të jesh duke shkuar në plazh për të marrë me vete një çantë kashte. Vajzat parisiane po tregojnë se ky aksesor mund të funksionojë po aq mirë edhe në qytet.
Një model klasik në ngjyrë bezhë është gjithmonë zgjedhje e sigurt, por këtë verë po shihen edhe versione me ngjyra, të cilat i japin veshjes një pamje më lozonjare.
Pantallonat e shkurtra sportive
Pantallonat e shkurtra sportive janë kthyer në një prej zgjedhjeve të preferuara të vajzave që përcaktojnë stilin e rrugës në Paris.
Sekreti për t’i bërë të duken më elegante është kontrasti. Në vend që të krijosh një veshje tërësisht sportive, kombinoji me një bluzë delikate dhe romantike. Një palë këpucë baleti e përfundon pamjen në mënyrë perfekte.
Kapelet e vogla
Pas vitesh larg vëmendjes, kapelet e vogla po rikthehen. Dhe duket se vajzat e modës në Paris nuk janë aspak gati të heqin dorë prej tyre.
Edhe pse mund të duken si një aksesor më i përshtatshëm për muajt e ftohtë, këtë verë mund t’i vishni me një fustan me lule për një kombinim të papritur dhe shumë elegant.
Bluzat me basqe
Jo, nuk ju duket juve. Bluzat me basqe janë rikthyer sërish në modë.
Megjithatë, versionet e këtij sezoni nuk kanë shumë lidhje me modelet elastike që mbizotëronin në vitet 2010. Këtë herë, basqet shfaqen në modele më elegante, të zbukuruara me qëndisje, dantella dhe detaje të tjera që i bëjnë të duken shumë më moderne.
Këpucët me platformë
Duam apo nuk duam, këpucët me platformë po përjetojnë momentin e tyre të rikthimit, veçanërisht në Paris.
Në vend të modeleve klasike prej tape ose espadrileve të vjetra, vajzat pariziene po zgjedhin modele më të pastra dhe moderne prej lëkure ose rrjete. Një tjetër kombinim i preferuar është veshja e tyre me pantallona të shkurtra deri te pulpat, një tjetër zgjedhje që po pëlqehet shumë në Paris.
Xhinset e grisura
Nëse garderoba juaj verore ka nevojë për një ndryshim të vogël, xhinset e grisura mund të jenë pikërisht ajo që kërkoni.
Mënyra parisiane për t’i veshur është t’i kombinoni me një bluzë të thjeshtë dhe shapka. Kur të vijë vjeshta, mjafton t’i zëvendësoni shapkat me këpucë baleti dhe t’i shtoni një triko të hollë.
-
-
-
-
-
Këto 6 stile bluzash janë zyrtarisht të vjetruara!
15 Korrik, 09:18 -
-
