Një ditë pasi u publikuan pjesë nga një dosje gjyqësore mes Feros dhe ish-partneres së tij Arbenita Ismajli, ku përfshiheshin edhe mesazhe kërcënuese që këngëtari dyshohet se i kishte dërguar modeles, ka ardhur reagimi i Feros.
Përmes një postimi në rrjetet sociale, Fero ndau një prononcim zyrtar nga avokatja e tij, e cila, mes të tjerash, u shpreh se pavarësisht gjithçkaje që po ndodh në publik dhe në sallën e gjyqit, Fero nuk do të ndalet së kërkuari vajzën e tij.
“Asnjë publikim i tillë, sado i keqorientuar apo i motivuar, nuk do të thyejë vullnetin e një babai që lufton për fëmijën e tij. Klienti im nuk ka kërkuar kurrë mëshirë, ai ka kërkuar vetëm drejtësi”, thuhet në deklaratën e avokates.
Ajo shtoi se për Feron, kjo nuk është thjesht një çështje gjyqësore, por një “betejë për një lidhje të shenjtë mes prindit dhe fëmijës”. Sipas saj, reperi do të vazhdojë përpjekjet për të takuar të bijën dhe nuk ka ndërmend të ndalet, pavarësisht zhvillimeve të fundit apo diskutimeve në publik.
View this post on Instagram
Në deklaratë përmendet edhe fakti që seanca e fundit gjyqësore, ku janë referuar materialet e publikuara, ka qenë e mbyllur për publikun, dhe publikimi i të dhënave të saj cilësohet si shkelje e procedurës. Avokatja Bedrie Rexhepi gjithashtu aludon se pala tjetër mund të jetë pas përpjekjeve për të zhvendosur vëmendjen ose për të manipuluar opinionin publik.
“Duket qartë se kjo situatë e ka shqetësuar dhe ka nxitur këtë reagim të dëmshëm publikisht, me qëllim zhvendosjen e vëmendjes dhe devijimin e të vërtetës”.
Më tej, ajo shtoi:
“Këto përpjekje të koordinuara për të diskredituar klientin tim nuk do ta ndalin asnjëherë dëshirën e tij të drejtë për të kërkuar vajzën e tij.”
Pavarësisht së gjithash, duket se për Feron ajo që ka rëndësi tani është një, vajza e tij dhe e drejta për ta parë atë.
