Për herë të parë, flet gruaja e të ndjerit Charlie Kirk: “Britmat e mia do të jehojnë në të gjithë botën”

Reuters

Erika Kirk, e veja e aktivistit të djathtë dhe konservatorit Charlie Kirk, dha deklaratën e parë pas vdekjes së bashkëshortit të saj në një atentat në Utah. Ajo u shpreh ndër të tjera se mesazhi i të shoqit të ndjerë dhe misioni i tij do të jenë “më të fortë, më të guximshëm dhe më të mëdhenj se kurrë” dhe se "britmat e saj do të jehojnë në të gjithë botën"!

“E dua shumë faktin se një nga motot e tij ishte: “Kurrë mos u dorëzo!”. Ne kurrë nuk do të dorëzohemi”, u shpreh ajo.

Më tej, Erika vijoi:

“Në një botë të mbushur me kaos, dyshim dhe pasiguri, zëri i bashkëshortit tim do të mbetet dhe do të tingëllojë më i fortë e më i qartë se kurrë. Mençuria e tij do të jetojë”, duke shtuar se turneu i tij do të vijojë, pavarësisht vdekjes së parakohshme të bashkëshortit të saj.

Erika Kirk theksoi gjithashtu se Charlie ishte vrarë sepse “ai predikonte një mesazh patriotizmi, besimi dhe dashurie të mëshirshme të Zotit”.

“Kriminelët përgjegjës për vrasjen e bashkëshortit tim nuk e kanë idenë çfarë kanë bërë. Ata duhet ta dinë! Nëse menduat se misioni i bashkëshortit tim ishte i fuqishëm më parë, tanimë nuk e keni idenë se çfarë keni çliruar në këtë vend dhe në botë…Britmat e mia do të jehojnë në të gjithë botën si një thirrje për betejë”.

Në atë që organizata e përshkroi si fjalimin e saj drejtuar kombit, Erika Kirk falënderoi oficerët e rendit dhe ata që ndihmuan në gjetjen dhe arrestimin e të dyshuarit për vrasjen e të shoqit. Tyler Robinson, 22 vjeç, u arrestua të premten në lidhje me të shtënat fatale dhe pritet të akuzohet të martën.

Ajo gjithashtu falënderoi JD Vance, të cilin e quajti “mik të ngushtë të bashkëshortit”, si dhe Donald Trump.

“Zoti president, bashkëshorti im ju deshi dhe ai e dinte që edhe ju e donit atë,” tha Erika Kirk, duke vijuar: “Miqësia juaj ishte e mrekullueshme.”

Erika Kirk foli gjerësisht për vlerat e krishtera të të shoqit, duke thënë se po të kishte kandiduar për një post, fokusi i tij do të kishte qenë “ringjallja e familjes amerikane” dhe se pjesën më të madhe të kohës e kalonte duke inkurajuar të rinjtë të gjenin bashkëshortë dhe të krijonin familje. Ajo tha se beteja ku ai ishte i përkushtuar nuk ishte politike, por “mbi të gjitha shpirtërore”.

Me gjuhë përçarëse dhe shpesh me retorikë paragjykuese, Charlie Kirk luajti një rol vendimtar në afrimin e të rinjve, sidomos djemve, me lëvizjen “Make America Great Again” (MAGA). Ai ishte i njohur për pikëpamjet e tij nxitëse dhe diskriminuese, nuk besonte në ndarjen mes kishës dhe shtetit dhe thoshte se demokratët “përfaqësojnë gjithçka që Zoti urren”.

Ai pretendonte se perëndimi ishte në një “betejë shpirtërore” me marksizmin dhe islamin, kërkonte ndalim total të kujdesit shëndetësor për transgjinorët, e përshkruante emigracionin nga vendet myslimane si “vetëvrasje civilizuese” dhe shpërndante teori konspirative mbi humbjen e Donald Trump në zgjedhjet e vitit 2020.

Gruaja e tij e përdori fjalimin për të mobilizuar të rinjtë, duke iu drejtuar nxënësve të shkollave të mesme dhe studentëve, që të vazhdojnë kauzën e tij. Ajo i nxiti ata të krijojnë ose të bashkohen me degët e “Turning Point USA” në shkollat e tyre.

Vdekja e Kirk, një aleat i ngushtë i Trump, ka sjellë edhe njëherë në qendër të vëmendjes kërcënimin në rritje të dhunës politike në SHBA. Vrasja u dënua nga të dyja palët politike. Megjithatë, në një intervistë në “Fox & Friends” të premten në mëngjes, presidenti amerikan tha “Nuk më intereson fare” kur u pyet se si synonte të bashkonte vendin pas të shtënave.

Ai shtoi: “Radikalët e djathtë janë radikalë sepse nuk duan të shohin krim. Radikalët e majtë janë problemi: ata janë të egër, të tmerrshëm dhe të zgjuar politikisht. Ata duan burra në sportet e grave, ata duan transgjinorë për të gjithë, ata duan kufij të hapur. Gjëja më e keqe që i ka ndodhur këtij vendi.”