Bill Gates ka zbuluar emrat e tre grave me të cilat ka pasur lidhje jashtëmartesore gjatë martesës së tij me Melinda French, gjatë një dëshmie me dyer të mbyllura për Komitetin e Mbikëqyrjes së Dhomës së Përfaqësuesve për lidhjet e tij të mëparshme me Jeffrey Epstein.
Në një dokument të shkruar të një interviste që është bërë pa detyrim ligjor, i cili u publikua më 23 qershor, bashkëthemeluesi i Microsoft-it pretendoi se Epstein e dinte për tradhtitë e tij dhe u përpoq t'i “ushtronte presion” për t’u “rilidhur”, ndërsa po “merrte në konsideratë” shantazhin.
Gates, i cili nuk është akuzuar për asnjë shkelje dhe ka mohuar çdo veprim “të paligjshëm”, foli me komitetin si pjesë e një hetimi të vazhdueshëm të lidhur me publikimin e dosjeve Epstein nga Departamenti i Drejtësisë. Gjatë intervistës, e cila u mbajt në Capitol Hill më 10 qershor, biznesmeni theksoi se marrëdhënia e tij trevjeçare me Epstein nga 2011 deri në 2014 ishte vetëm profesionale. Megjithatë, Gates pretendoi se Epstein u përpoq të kontaktonte kur mësoi për pabesinë e tij.
“Pas kësaj mësova se Epstein kishte marrë informacion për jetën time personale, përfshirë faktin që kisha qenë i pabesë në martesën time. Këto marrëdhënie nuk kishin asnjë lidhje me ndërveprimet e mia me Epstein, por ato ishin të dhimbshme për familjen time,” tha Gates gjatë intervistës.
Gates, i cili finalizoi divorcin nga French në 2021-shin pas 27 vitesh martesë, përmendi lojtaren e bridge-it Mila Antonova dhe shkencëtaren bërthamore Karima Nigmatulina si dy nga gratë me të cilat kishte pasur lidhje jashtëmartesore. Ai gjithashtu identifikoi më vonë doktoreshën Alice Jacobs Nesselrodt, të cilën e kishte takuar në një konferencë para vitit 2010, pasi komiteti zbuloi se emri i saj i redaktuar ndodhej në dosjet Epstein.
Gates deklaroi se beson se punonjësi që e kishte prezantuar me Epstein ishte ai që i kishte treguar për lidhjet e tij jashtëmartesore, duke thënë:
“Epstein po përpiqej të përdorte informacionin mbi pabesitë e mia, përveç shumë gënjeshtrave që shtonte mbi to, për të më ushtruar presion që të rilidhesha me të. Ai nuk ia doli në këtë përpjekje, por kjo tregon disa nga mënyrat se si përpiqej të shfrytëzonte ndërveprimet me mua për të çuar përpara agjendën e tij. Nuk duhet ta kisha takuar kurrë Epstein-in.”
70-vjeçari sqaroi:
“Nuk ka pasur kurrë një kërcënim të drejtpërdrejtë të tipit ‘nëse nuk bën diçka, do ta zbuloj këtë’. Ka pasur një gjuhë të nënkuptuar, të tipit ‘të gjithë duhet të jemi miq’. Dhe siç kam thënë, unë e mora shumë seriozisht dhe i thashë: ‘Nëse mendon se do të marrësh më shumë para nga kjo, nuk do të ndodhë, dhe nëse kjo do të thotë që do të flasësh me njerëz për gjëra të tilla, unë thjesht do ta përballoj dhe do ta zgjidh vetë.’”
Gates shtoi më vonë, "Ai kurrë nuk më shantazhoi, por duke parë këto email-e, ngre një probabilitet serioz që ai kishte menduar të më shantazhonte."
