Mirëmëngjes o njerëz të shëndetshëm që vendosni prioritet gjumin dhe shëndetin tuaj para çdo gjëje në këtë botë! Ju kam zili, por ja tek po ju ofroj me dëshirën më të madhe shërbimin tim për sot:
#1. Kanë qenë të lidhur Brikena dhe Mateo apo jo?
Përgjigjja e shkurtër: JO! Dhe sipas Mateos, ai s’pretendoi kurrë se ishte lidhur ndonjëherë me Brikenën. Thjesht kanë folur për një kohë të gjatë, janë takuar një herë të vetme dhe aty u mbyll. Pra, të qetësohen ata që po shqetësohshin për numrin e lidhjeve të Brikenës, ajo vazhdon të këmbëngulë se qëndron te 0, ndonëse s’është ndonjë gjë për t’u krenuar apo turpëruar…
#2. E vërteta e “largimit” të Stines
Një ditë Stine u zgjua me dëshirën për t’i punuar banorëve një rreng që vetëm gjatë këtij edicioni e kanë bërë nja dy-tre vetë para tij. Duket se Stine ishte në humor për të marrë pak dashuri dhe u shtir sikur donte të largohej nga shtëpia.
Pjesa më e bukur këtu ishte se protagonizmin e mori – falë montazhit – thumbi i Stines ndaj Mirit. Miri, që ndodhej i izoluar në akuarium kur mori vesh për “ikjen” e Stines, u prek nga ky veprim dhe tha se do largohej bashkë me Stinen, duke e konsideruar mik fort të ngushtë.
E bukura qëndron se në fund të klipit produksioni futi një deklaratë të Stines duke thënë se “Miri ka ecur falë meritave të tjetër kujt dhe është i paplotësuar në jetë”. Dhe në momentin që Miri mund ta shfrytëzonte këtë deklaratë, që u duk se “miku i ngushtë” e mendonte vërtet, ai s’na dha asgjë. Ndoshta u zu gafil, ta shohim në vazhdim.
#3. Hyn një banor i ri
Flori është VIP sepse qenka shitës profesional në TikTok. Emocionet ishin të mëdha, si për banorin e ri, ashtu edhe për hamshorin që, siç tha dhe Ledioni, la dhe bereqetin e vet aty në studio.
#4. Eliminohet Armiri
Çfarë the? Kush është Armiri? Një njeri i mirë, kaq vlen për t’u mbajtur mend.
#5. Injorohet komplet gjëja e çuditshme që po ndodh mes Mirit dhe Selinit
Që do të thotë se u përgatit klipi për gjërat e fundit që ndodhën mes babës dhe bijës: ndarja që kur Miri iku në akuarium, lotët e tij për Selinin, deklarata se “e do”, vazhdimi i të fjeturit bashkë pavarësisht letrës së babait të Selinit, e tjerë, e tjerë.
Dinamika më interesante deri më tani, u konsumua me një komentim të Monikës që e justifikoi gjënë si "xhentilesë të Mirit" dhe kaq. Produksioni, më duket se keni dikë mes jush që do t’jua shkatërrojë biznesin.
Pak sens u përpoq të sillte vetëm Arbri duke dhënë mendimin se midis dyshes edhe mund të kenë lindur ndjenja, jo se kjo është në rregull gjithsesi, duke marrë parasysh statusin e Mirit.
#6. Surpriza për Angelon nga vëllai
View this post on Instagram
#7. Banori i ri: Erik Lloshi
Ca kohë më parë, Eriku është shprehur se po të futej në Big Brother, do divorcohej nga gruaja. Shpresojmë që hyrja e djeshme mos të jetë mjeti për të arritur një qëllim të tillë. Na falni për shijen e hidhur, por janë pasojat që po na lë Miri.
#8. Televotimi i radhës
Portokallia duket se do e marrë shpejt mbrapsht aktorin e vet, sepse vështirë që Juxhini t’i shpëtojë këtij televotimi përballë dyshes së çuditshme të këtij edicioni: po, e gjetët, Mirit dhe Selinit. Po ku i dihet, Big Brother është, bën vaki edhe s’të dalin parashikimet. :)
