Pinterest nuk bën parashikime trendesh sa për sy e faqe. Si e dimë këtë? Sepse faktet flasin vetë: parashikimet e Pinterest gjatë gjashtë viteve të fundit kanë rezultuar të sakta në 88% të rasteve.
“Pinterest është një platformë thellësisht vizuale, ndaj analiza jonë e trendeve shkon përtej kërkimeve tekstuale,” shpjegon kompania në një deklaratë. “Ne shohim panoramën e plotë, ngjyrat, estetikën dhe stilet që i tërheqin njerëzit. Duke analizuar rritjen nga viti në vit, identifikojmë modelet që po rriten me shpejtësi dhe i përmbledhim gjetjet në një raport që sheh drejt së ardhmes.”
Pra, çfarë pritet të shpërthejë në vitin 2026? Raporti më i ri i platformës përfshin disa kategori, si bukuria, shtëpia, moda, udhëtimet, ushqimi dhe të tjera, por këtu fokusi është vetëm te moda. Meqë Viti i Ri po afron me shpejtësi, le të kalojmë menjëherë te thelbi. Më poshtë janë trendet që dalin nga parashikimet e Pinterest.
1. Karficat
Termi “estetika e karficave” është rritur me 110% në kërkimet në Pinterest nga viti 2024 në 2025. Siç u vu re në kohë reale, tapeti i kuq i mbrëmjes së modës Met Gala 2025 ishte i mbushur me karfica të të gjitha formave dhe madhësive. Veçanërisht, aktorja Sarah Snook mbante gjashtë karfica të ndryshme me gurë të çmuar në jakë dhe një të shtatë të vendosur në qendër të jakës së këmishës.
2. Bluja e akullit
Ka ardhur koha e shkëlqimit për blunë e akullt. Sipas Pinterest, kërkimet për “blu akulli” janë rritur me 50%, ndërsa termi “estetika e akullnajës” ka shënuar rritje prej 35%. Një tjetër tendencë befasuese është rritja e interesit për fustane nusërie në nuanca blu akulli. Kujt ia kishte pritur mendja?
3. Stil maksimalist i shndritshëm
“Dekada e teprisë është rikthyer në modë dhe, sinqerisht, ishte koha,” shpjegon Pinterest në raport. “Kostumet me shpatulla të formësuara do të bëhen edhe më të bujshme. Jakat e larta do të jenë baza e çdo veshjeje. Dhe bizhuteritë? Ato do të bëhen më të mëdha, më të guximshme dhe më të arta. Brezi i ri dhe brezi i mesëm po e shtyjnë përpara këtë estetikë maksimaliste.”
