Të shkosh në koncert dikur nënkuptonte të këndoje, të kërceje dhe të shijoje muzikën live. Sot, sipas ekspertëve të etikës, gjithnjë e më shpesh nënkupton të përballesh me sjellje që variojnë nga bezdisëse deri te krejtësisht të papranueshme. Nga hedhja e objekteve në skenë, te filmimi i çdo sekonde të performancës dhe deri te raste që kanë bërë xhiron e internetit për arsye krejt të gabuara, etika në koncerte duket se po kalon një krizë serioze.
Ekspertët e etikës Mariah G. Humbert dhe Jo Hayes besojnë se dy faktorë kanë luajtur rol të madh në këtë fenomen: pandemia dhe ndikimi i mediave sociale. Sipas tyre, shumë të rinj kaluan vitet më të rëndësishme të socializimit në izolim, duke humbur disa nga rregullat bazë të bashkëjetesës në hapësira publike. Në të njëjtën kohë, rrjetet sociale kanë nxitur një kulturë ku shumë njerëz janë më të përqendruar te krijimi i përmbajtjes sesa te përjetimi i momentit.
Një nga fenomenet më të çuditshme që ka tërhequr vëmendjen vitet e fundit është rritja e rasteve të raportuara të njerëzve që kryejnë nevojat personale në mes të turmës, vetëm për të mos humbur vendin pranë skenës. Artistë si Olivia Rodrigo dhe Noah Kahan kanë folur publikisht për situata të tilla, duke i quajtur jo vetëm të papranueshme, por edhe mungesë respekti ndaj stafit dhe fansave të tjerë.
Përtej rasteve ekstreme, ekspertët thonë se problemet më të zakonshme mbeten telefonat e ngritur gjatë gjithë koncertit, bisedat me zë të lartë, njerëzit që këndojnë aq fort sa mbulojnë artistin dhe mungesa e respektit për hapësirën personale të të tjerëve. Sipas tyre, koncertet janë përvoja kolektive dhe kërkojnë një minimum vetëdijeje për ata që ndodhen përreth.
Rregulli më i thjeshtë? Silluni me të tjerët ashtu siç do të donit të silleshin me ju. Kjo do të thotë të konsumoni alkool me përgjegjësi, të respektoni stafin e sigurisë, të mos filmoni çdo minutë të shfaqjes dhe të mos harroni se njerëzit pranë jush kanë paguar po aq sa ju Fundja, koncertet duhet të jenë vende ku krijohen kujtime të bukura, jo histori virale për sjellje të pahijshme. Dhe sipas ekspertëve, pak më shumë respekt dhe vetëkontroll mund ta bëjnë përvojën më të mirë për të gjithë.
