Ka diçka që i lidh më shumë njerëzit: E qeshura, e cila është pjesërisht gëzim, pjesërisht çlirim dhe pjesërisht një shenjë e pashkruar që thotë: “Ne e kuptojmë njëri-tjetrin.” Njeriu qesh shumë më shpesh me të tjerët sesa kur është vetëm dhe shpesh nuk ka të bëjë aq shumë me humorin, sa me momentin që ndan me të tjerët.
Marrëdhëniet lulëzojnë falë këtyre momenteve të gëzimit të përbashkët. E qeshura mund të jetë një “ngjitës” i fortë në shoqëri dhe në lidhje. Kur qesh me dikë tjetër, “sinkronizoheni” dhe ndiheni sikur jeni në të njëjtin frekuencë. Kjo është arsyeja pse “e qeshura e përbashkët” mund të përmirësojë marrëdhëniet.
E qeshura e përbashkët forcon afërsinë emocionale dhe ndjesinë e mbështetjes
Në një studim të vitit 2015, i botuar në “Personal Relationships”, studiuesit shkuan përtej faktit që e qeshura të bën të ndihesh mirë dhe eksploruan nëse ajo mund të matet si një tregues i shëndetit të marrëdhënies. Ata e studiuan këtë duke vëzhguar çifte që qeshnin bashkë dhe duke analizuar saktësisht se çfarë tregonin ato të qeshura për lidhjen e tyre.
Në eksperiment, çdo e qeshur u regjistrua me video, qoftë një buzëqeshje e lehtë apo një shpërthim i pakontrolluar. Më pas, studiuesit gjetën modele që tregonin rolin e të qeshurës së përbashkët në lidhje dhe afërsi. Bazuar në këtë studim të vitit 2015, ja dy mënyra si e qeshura e përbashkët mund ta bëjë dashurinë më të fortë:
Në marrëdhëniet e afërta, nuk janë vetëm gjestet e mëdha romantike që kanë rëndësi. Momentet e vogla, ato që shpesh anashkalohen ose merren si të mirëqena, kanë fuqinë të forcojnë në heshtje lidhjen. E qeshura e përbashkët, si një nga këto momente, luan rol kyç në ndjenjën e afërsisë mes partnerëve.
Në këtë studim, hulumtuesit u kërkuan 71 çifteve të tregonin historinë se si ishin njohur, ndërsa regjistroheshin me video. Më pas, ata koduan çdo moment të qeshure, duke dalluar të qeshurat individuale nga ato kur të dy partnerët qeshnin në të njëjtën kohë.
Rezultatet treguan një model të qartë: Çiftet që qeshnin më shpesh bashkë gjatë bisedës (edhe kur llogaritej çdo e qeshur tjetër) raportuan ndjeshëm më shumë afërsi emocionale dhe mbështetje nga partneri. Kjo tregon se e qeshura e përbashkët nuk është vetëm pasojë e një marrëdhënieje të mirë, por edhe një përbërës aktiv në ndërtimin e saj. Kjo ndodh sepse e qeshura e përbashkët krijon ndjesinë se e shihni botën në të njëjtën mënyrë. Ajo sinjalizon mirëkuptim të ndërsjellë dhe rehati, cilësi që e bëjnë më të lehtë ruajtjen e intimitetit emocional.
Kur dy persona reagojnë me të qeshur ndaj të njëjtit nxitës, ata përforcojnë ndjesinë se janë “në të njëjtin ekip”. Ndërsa reflekton për rëndësinë e të qeshurës së përbashkët, kujto se nuk ka nevojë ta shtiresh. Qëllimi është të mbetesh i hapur ndaj humorit në përditshmëri, në veçantitë, çuditë apo edhe në pjesët e pasistemuara të jetës. Kjo mund të endë në heshtje një fije më të fortë emocionale mes teje dhe partnerit. Ndoshta me kalimin e viteve nuk do t’i mbash mend shakatë, por do të kujtosh ndjesinë e të qenit i kuptuar dhe i lidhur me të.
E qeshura e përbashkët rrit kënaqësinë dhe cilësinë e marrëdhënies
Ndikimet pozitive të së qeshurës të përbashkët shkojnë përtej afërsisë emocionale. Ajo nuk të afron vetëm në moment, por ndikon edhe në mënyrën se si partnerët e vlerësojnë marrëdhënien në tërësi. Kur e qeshura është e pranishme shpesh, ajo mund të formësojë pozitivisht klimën emocionale të marrëdhënies, duke e bërë më të lehtë dhe më të këndshme bashkëjetesën. Me kalimin e kohës, këto momente gazmore bëhen pjesë e historisë së përbashkët të çiftit, ndikojnë në mënyrën si e perceptojnë marrëdhënien dhe nëse e shohin si burim gëzimi apo stresi.
Në të njëjtin studim, u zbulua se çiftet që qeshnin më shpesh së bashku kishin vlerësime më të larta për cilësinë e marrëdhënies së tyre, edhe kur merreshin parasysh faktorë si ndjesia individuale e humorit apo pozitiviteti i përgjithshëm.
Edhe pse lidhjet me ndjenja si pasioni dhe përkushtimi ndryshonin disi sipas gjinisë, modeli për kënaqësinë e përgjithshme mbeti i qëndrueshëm. Kjo sugjeron se veprimi i thjeshtë i të qeshurës bashkë është një faktor i pavarur që kontribuon në lumturinë brenda marrëdhënies.
Kënaqësia në dashuri nuk ndërtohet vetëm mbi përputhshmërinë apo aftësinë për të zgjidhur probleme. Momentet kur qeshni bashkë, në çdo formë, janë kujtesa të shpërndara përgjatë marrëdhënies se gëzimi është ende aty, i pranishëm dhe i arritshëm.
E qeshura ka fuqinë të transformojë momentet. Edhe situatat e rënda apo të pakëndshme mund të duken më të lehta kur përfshihet humori, prandaj shumë njerëz gjejnë ngushëllim te humor ii zi. Për shumëkënd, ai është një mekanizëm përballimi. Pikërisht për këtë arsye seriale si “The Office” apo “Brooklyn Nine-Nine” arrijnë të trajtojnë tema të thella si humbja, dështimi dhe identiteti, pa të lënë të ndihesh i rraskapitur emocionalisht.
