Princi Harry ka folur si rrallëherë për fëmijët e tij, princin Archie dhe princeshën Lilibet, duke zbuluar se një nga mësimet më të vlefshme për prindërimin e ka marrë nga nëna e tij, princesha Diana. Gjatë episodit më të fundit të podkastit të Joe Marler, ai tregoi se përpiqet ta zbatojë çdo ditë këtë mësim në marrëdhënien me dy fëmijët që ka me Meghan Markle.
"Nëse dita ka qenë e vështirë, një gjë që bëj gjithmonë është t'i përqafoj fëmijët e mi edhe më fort se zakonisht," tha Harry, duke folur për Archie-n dhe Lilibet-in.
Ai ka treguar edhe më parë se Diana e përqafonte atë dhe vëllanë e tij, princin William, "sa më fort që mundej", një kujtim që e ka shoqëruar gjatë gjithë jetës dhe që sot frymëzon mënyrën si sillet si baba.
Javën e kaluar, Harry dhe fëmijët e tij u ribashkuan zyrtarisht me gjyshin e tyre, mbretin Charles. Meghan Markle organizoi një udhëtim drejt Mbretërisë së Bashkuar në momentet e fundit, ndërsa Harry po përfundonte një vizitë në vendlindjen e tij.
Sipas raportimeve të revistës People, Archie, Lilibet, Meghan dhe Harry vizituan mbretin Charles në Highgrove House, rezidenca e tij kryesore në fshat. Takimi u mbajt plotësisht privat dhe nuk do të publikohen fotografi apo detaje të tjera nga vizita.
Herën e fundit që Archie dhe Lilibet kishin takuar gjyshin e tyre ishte në vitin 2022, kur udhëtuan me prindërit në Mbretërinë e Bashkuar për festimet e Jubileut të Platinit të mbretëreshës Elizabeth. Disa muaj më vonë, Meghan u rikthye në Britani me Harry-n për të marrë pjesë në ceremoninë mortore të mbretëreshës.
Raporte të ndryshme kanë bërë të ditur se Meghan, Archie dhe Lilibet mund të kenë udhëtuar për një vizitë të shkurtër në Mbretërinë e Bashkuar pasi kërkesa e Harry-t për mbrojtje të përhershme shtetërore për familjen e tij ishte refuzuar. Thuhet se Harry po kërkonte me ngulm një zgjidhje në momentet e fundit për t'i sjellë në Britani, qoftë edhe vetëm për 24 orë, pasi siguria u garantohej vetëm kur ndodheshin në rezidencat mbretërore.
Më 8 korrik, gazeta The Mirror raportoi se Harry mbetet ende me shpresën për një ribashkim më të gjerë familjar me Mbretin Charles.
"Edhe pse asgjë nuk është vendosur përfundimisht, bisedimet vazhdojnë," tha një burim.
Një tjetër burim pranë familjes mbretërore shtoi se mbreti Charles nuk do ta humbiste mundësinë për të kaluar kohë me nipërit e tij.
-
-
Pas 4 vitesh, familja mbretërore pati një takim që dukej i pamundur
11 Korrik, 11:23 -
