Foto: Selena Gomez/ Michael Tran//Getty Images

Nëse këtë verë do të shihni gra me prerje flokësh voluminoze në bregdetin italian, në rrugët e Romës, Firences, Sardenjës apo pranë Liqenit të Komos, ka shumë gjasa të kenë zgjedhur të njëjtin model: bob-in italian.

Ashtu si “bob-i francez” lidhet me elegancën pariziene, edhe bob-i italian frymëzohet nga glamuri klasik i ikonave si Sophia Loren, Monica Bellucci dhe Gina Lollobrigida. Është versioni më elegant, më i sofistikuar dhe më luksoz i prerjes së famshme bob.

Çfarë është bob-i italian?

Ndryshe nga bob-i klasik që zakonisht përfundon te mjekra, bob-i italian është pak më i gjatë dhe më i plotë.

Sipas stilistit të flokëve Philipp Haug, kjo prerje zakonisht përfundon pak poshtë mjekrës ose në nivelin e nofullës dhe karakterizohet nga shumë lëvizje, formë dhe volum.

Qëllimi kryesor është të krijojë flokë që duken të harlisur dhe elegantë, por pa u përpjekur shumë. Pikërisht ai kombinim mes glamurit dhe natyrshmërisë që italianet e bëjnë të duket kaq i lehtë.

Cili është ndryshimi me bob-in francez?

Dallimi më i madh është gjatësia.

Bob-i francez është zakonisht më i shkurtër, shpesh në nivelin e mjekrës ose edhe më sipër, me një pamje më të çrregullt dhe lozonjare.

Bob-i italian, nga ana tjetër, ka më shumë peshë, volum dhe lëvizje. Ndërsa versioni francez shoqërohet shpesh me balluke të drejta ose teksturë më të çlirët, ai italian preferon flokë më të fryrë dhe shpesh kombinohet me balluke të ndara në mes.

Kujt i shkon më shumë?

Lajm i mirë për vajzat me flokë të trashë dhe të dendur: kjo prerje duket fantastike te ju.

Bob-i italian nxjerr në pah volumin natyral të flokëve dhe funksionon shumë mirë edhe për teksturat me onde ose kaçurrela.

Megjithatë, nuk përjashtohen as flokët e hollë. Falë prerjes së drejtë në fund, krijohet iluzioni i flokëve më të dendur. E vetmja gjë që rekomandohet është të shmangen shtresëzimet e tepërta, pasi mund t’i bëjnë flokët të duken më të rrallë.

Sa i përket formës së fytyrës, kjo është një nga prerjet më të gjithanshme. Ajo favorizon veçanërisht fytyrat ovale, në formë zemre dhe ato më të zgjatura, sepse gjatësia dhe volumi krijojnë një ekuilibër shumë harmonik.

Si stilizohet?

Nëse zgjidhni këtë model, duhet të dini një gjë: volumi është gjithçka.

Për flokët e trashë mjafton shpesh një tharje me furçë të rrumbullakët për të krijuar efektin e dëshiruar.

Për flokët më të hollë rekomandohen produkte që japin volum në rrënjë, ndërsa në fund një spërkatës me shkëlqim ndihmon për të krijuar atë pamjen luksoze që e karakterizon bob-in italian.

Kush e ka provuar tashmë?

Ky model është zgjedhur nga shumë emra të njohur, mes tyre Laura Harrier, Sydney Sweeney, Gracie Abrams, Zendaya, Ariana Greenblatt, Khloé Kardashian, Halle Berry, Gigi Hadid dhe Selena Gomez.

Nëse po mendoni të prisni flokët këtë verë, bob-i italian është një nga ato modele që arrin të duket njëkohësisht klasik, modern dhe shumë shik. Në fund të fundit, nëse ka një gjë që italianët dinë ta bëjnë mirë, është t’i japin elegancë edhe gjërave më të thjeshta.