Tendencat e bukurisë janë bërë gjithnjë e më minimaliste vitet e fundit dhe trendi i fundit që pushtoi verën janë qerpikët “fantazmë”.
Bëhet fjalë për një pamje shumë natyrale të syve, ku qerpikët lihen pothuajse të paprekur ose theksohen fare pak. Mund të mos përdorësh rimel, të aplikosh serum për qerpikët ose të zgjedhësh një rimel transparent. Ideja është të heqësh dorë nga rimeli i zi, madje edhe ai kaf.
Pamja është veçanërisht praktike gjatë temperaturave të larta dhe ditëve në plazh, pasi shmang njollat dhe rrjedhjen e rimelit.
Sipas grimieres Ashunta Sheriff, mungesa e rimelit nuk do të thotë se sytë humbasin përkufizimin. Përkundrazi, kjo mënyrë i jep bukurisë një pamje më të freskët dhe natyrale.
Një tjetër mënyrë për të tërhequr vëmendjen te sytë janë vetullat e rregulluara mirë. “Një vetull e plotë dhe e ngritur krijon strukturë dhe tërheq vëmendjen te sytë”, thotë Sheriff.
Trendi vjen në një kohë kur po bie edhe popullariteti i zgjatimeve të qerpikëve, ndërsa bukuria që kërkon më pak mirëmbajtje po bëhet gjithnjë e më e preferuar. Nga flokët që nuk kërkojnë mirëmbajtje të shpeshtë, te manikyri pothuajse i padukshëm, pamja natyrale po fiton terren.
Dhe përveçse kursen kohë e para, kjo qasje mund të jetë më e mirë edhe për qerpikët. Sipas Sheriff, mosaplikimi dhe heqja e vazhdueshme e produkteve mund të ndihmojë në parandalimin e këputjes së tyre.
Qerpikët “fantazmë” do të jenë edhe në vjeshtë
Edhe pse shumë personazhe të njohur e përqafuan këtë pamje gjatë verës, Zendaya e bëri trendin edhe më të bujshëm me pamjen e saj gjatë turneut promovues të filmit "Odyssey".
Grimieri Sangwon Jeon parashikon se qerpikët “fantazmë” do të vazhdojnë të jenë të pranishëm edhe gjatë vjeshtës së vitit 2026.
“Besoj se do të vazhdojnë të kenë një rol të rëndësishëm edhe në vjeshtë, ndërsa rritet dëshira për një grim natyral dhe minimalist”, thotë ai.
Sipas Jeon, bukuria po largohet nga ideja se çdo tipar i fytyrës duhet të jetë i përsosur ose i theksuar fort. Qerpikët e butë dhe pothuajse të paprekur janë pjesë e kësaj qasjeje.
Si ta bësh grimin me qerpikë “fantazmë”
Për të mos krijuar përshtypjen sikur nuk je grimuar fare, përqendrohu te lëkura.
Jeon sugjeron një bazë të lehtë dhe të njëtrajtshme, duke përdorur korrigjues vetëm aty ku nevojitet për skuqjet ose ndryshimet e ngjyrës së lëkurës. Qëllimi është të barazohet pamja e saj pa e mbuluar plotësisht.
Pak ngjyrë në faqe i jep fytyrës gjallëri dhe dimension, ndërsa një hije e lehtë me shkëlqim në qepalla mund t’u japë syve thellësi pa e rënduar pamjen.
A janë të mirë për qerpikët?
Oftalmologia Diane Hilal-Campo thotë se kjo prirje është veçanërisht e dobishme për ata që duan t’u japin qerpikëve kohë të rikuperohen.
Përdorimi i përditshëm i rimelit, sidomos kur nuk hiqet plotësisht ose kur sytë fërkohen gjatë pastrimit, mund të bllokojë folikulat, të shkaktojë inflamacion të qepallave dhe, me kalimin e kohës, t’i bëjë qerpikët më të hollë, më të brishtë dhe më të prirur për t’u këputur.
Prandaj, periudhat pa rimel mund t’u japin qerpikëve mundësinë të rikuperohen dhe syve një pushim nga irritimet e mundshme.
Nëse qerpikët janë dëmtuar nga zgjatimet, mjekja këshillon shmangien e rimelit dhe përdorimin e një serumi për forcimin dhe rritjen e tyre.
“Të mos përdorësh rimel ul ekspozimin ndaj pigmenteve dhe konservuesve që mund të shkaktojnë tharje dhe inflamacion, si dhe mbron gjëndrat e ndjeshme të qepallave, të cilat janë të rëndësishme për prodhimin e lotëve dhe shëndetin e syve”, shpjegon ajo.
