Shqipëria feston këtë 28 Nëntor 113-vjetorin e Pavarësisë. Njohur ndryshe si Dita e Flamurit, shqiptarët kudo që janë, festojnë këtë ditë për të shënuar momentin kur, 113 vite më parë, Ismail Qemali ngriti flamurin në Vlorë.
Asambleja prej 40 delegatëve në kasabanë e Vlorës më 28 Nëntor 1912 shpalli pavarësinë e Shqipërisë. Procesverbali, pas të cilit u radhitën firmat e të dërguarve që u pajtuan për shpalljen, u diktua nga Ismail Qemali dhe u shkrua në gjuhën shqipe nga Luigj Gurakuqi, ndërsa më pas në osmanisht nga Shefqet Dajiu.
Shpallja e Pavarësisë së Shqipërisë është shpallja e pavarësisë së vilajetit shqiptar nga Perandoria Osmane në kushtet e Luftës së Parë Ballkanike. Shqipëria u vetëshpall e pavarur në Vlorë më 28 nëntor 1912 nga Ismail Qemali.
Në shpalljen e pavarësisë morën pjesë 40 delegatë nga të gjitha trevat shqiptare. Menjëherë pas shpalljes së pavarësisë, Asambleja e Vlorës formoi qeverinë e parë të Shqipërisë së Pavarur, të drejtuar nga Ismail Qemali, si dhe Pleqësinë.
Shpallja e Pavarësisë do të përbënte gurthemelin në krijimin e shtetit sovran të Shqipërisë.
