Stine vendosi të largohet përfundimisht nga shtëpia e “Big Brother VIP Albania 5”, duke i dhënë fund rrugëtimit të tij në këtë format. Vendimi u bë publik gjatë nisjes së spektaklit, ku ai u shpreh hapur se nuk sheh më asnjë arsye për të vijuar lojën.
“E kam thënë disa herë arsyen. Nuk kam më arsye që të rri këtu. Arsyeja pse hyra nuk ekziston më. Fillimisht ishte për të luajtur, por tani më ka ikur dëshira e lojës. Jam në vendin e gabuar, ndaj vendosa të dal. U përpoqa të ambientohesha, por është e pamundur. Është një vendim personal, nuk ka lidhje me askënd,” – u shpreh Stine.
Deklarata e tij ngjalli reagime edhe në studio. Opinionisti Arbër Hajdari theksoi se, sipas tij, Stine kishte ende arsye për të qëndruar në shtëpi, duke nënvizuar se loja nuk lidhet vetëm me strategjinë, por edhe me të qenit njeri.
Nga ana tjetër, Stine preferoi të mos e zgjasë më tej diskutimin. “Nuk dua ta ekspozoj më shumë se kaq njeriun, kaq është,” – tha ai shkurt.
Me këtë deklaratë, këngëtari mbylli përfundimisht përvojën e tij në “Big Brother” duke zgjedhur familjen përpara lojës.
