A keni menduar ndonjëherë pse një pjatë e gatuar nga dikush tjetër duket shumë më e shijshme sesa ajo që bëni vetë? Edhe kur ndiqni një recetë hap pas hapi, rezultatet shpesh nuk janë të njëjta. Nëse jeni të lodhur nga mishi i thatë apo perimet e gatuara keq, mos u shqetësoni - nuk jeni vetëm, dhe ka arsye të mirëfillta për këtë fenomen.

Sekreti që fshihet pas shijes së restoranteve

Një arsye kryesore pse ushqimi i restoranteve duket kaq i shijshëm është përdorimi i vajrave, gjalpit dhe erëzave. Restorantet nuk kursehen kur vjen puna te këto përbërës që i japin pjatave shijen perfekte. Kur gatuajmë në shtëpi, zakonisht jemi më të kursyer me to, qoftë për arsye shëndetësore apo praktike.

Për më tepër, kuzhinierët profesionistë kanë akses në pajisje industriale dhe përbërës të cilësisë më të lartë. “Një fritezë industriale është diçka që pak njerëz kanë në shtëpi, por shumica e restoranteve po,” thotë shefi Scott Duke. “Pulën e skuqur thellësisht në vaj e bën shumë më të shijshme sesa një pulë e pjekur lehtë në tigan.”

Kjo, e kombinuar me trajnimet dhe përvojën e gjatë të kuzhinierëve, sjell rezultate që ne në kuzhinat tona nuk mund t’i arrijmë gjithmonë. “Kuzhinierët e dinë saktësisht si të nxjerrin shijet më të mira nga çdo pjatë që përgatisin,” thotë shefja Rena Awada.

Ana psikologjike e shijes

Shija e ushqimit nuk është vetëm çështje përbërësish dhe teknike gatimi. Ka të bëjë edhe me mënyrën si e perceptojmë atë. Sipas shkencëtares ushqimore Sarah Bond, procesi i gatimit në shtëpi ndikon në përvojën tonë të shijimit.

“Kur gatuani vetë, jeni të ekspozuar ndaj aromave gjatë gjithë kohës, dhe kjo mund t’ju desensibilizojë para se të merrni kafshatën e parë,” shpjegon Bond. Nga ana tjetër, kur dikush tjetër përgatit ushqimin, ju nuk merrni pjesë në këtë proces dhe përjetoni shijet dhe aromat në mënyrë më intensive, duke i bërë ato më të shijshme.

Si ta përmirësoni gatimin në shtëpi

Edhe pse ushqimi i restoranteve mund të duket i pakrahasueshëm, ka disa mënyra për ta përmirësuar gatimin në shtëpi:

1.Përdorni përbërës cilësorë

Investoni në produkte të freskëta, mundësisht nga tregjet e fermerëve lokalë, për të marrë shije më autentike.

2.Mos kurseni me erëzat

Sipas Awada-s, përdorimi i duhur i kripës, piperit dhe erëzave të tjera mund të bëjë diferencën e madhe.

3.Pushoni gjatë gatimit

Bond sugjeron të largoheni për disa minuta nga kuzhina gjatë procesit, për të “rifreskuar” shqisat.

4.Shtoni detaje të vogla

Një spërkatje e vajit me aromë, pak lëng limoni apo ca erëza të freskëta në fund mund të transformojnë një pjatë të zakonshme në diçka të veçantë.

Edhe nëse nuk keni një fritezë apo një përvojë të gjatë në kuzhinë, këshillat e mësipërme mund t’ju ndihmojnë të afroni shijet e restoranteve në shtëpinë tuaj. Dhe në fund të fundit, mos e fajësoni veten shumë - ndonjëherë, thjesht është më mirë kur dikush tjetër merr drejtim.

Artikuj të sugjeruar: