I ftuar në "UëTëFë Show" në Andale Media, Erik Lloshi ka folur ndër të tjera edhe për Shpat Kasapin, me të cilin ai kishte një shoqëri të afërt. Duke qenë pranë tij, Erik Lloshi ka përgënjeshtruar me siguri lajmet që kanë qarkulluar së fundmi për djalin e Shpatit, sikur është fëmijë me autizëm. Për këtë, Eriku sqaroi:
"Nuk është në spektrin e autizmit. Kjo nuk është e vërtetë fare, kjo hidhet poshtë si hipotezë sepse djali është shumë mirë, thjesht ka një vonesë në të folur. Nuk ka lidhje me autizmin, është një hipotezë që unë nuk po kuptoj se si kanë guximin mediet që ta nxjerrin këtë lloj gjëje pa u siguruar."
Kështu, duke u shprehur se fëmija "është shumë mirë, dhe jo autik", Erik Lloshi bëri pa dashje një deklaratë problematike që rëndom e dëgjojmë: që njerëzit brenda spektrit autik nuk janë mirë!
Kjo mënyrë të shprehuri nuk u ka shpëtuar me të drejtë as komentuesve:
Ndonëse qëllimi i Erikut nuk ka qenë negativ, shprehja mbetet problematike dhe lënduese. Ajo e vendos autizmin në një pozicion nënçmues, duke ushqyer edhe një herë stigma të panevojshme.
Autizmi është çrregullim i zhvillimit neurologjik, jo sëmundje, dhe shfaqet ndryshe te çdo individ. Disa persona autikë kanë nevoja më të mëdha mbështetjeje, të tjerë mund të kenë dhe aftësi të jashtëzakonshme. Pikërisht për këtë arsye, mënyra si flasim për tema kaq komplekse është shumë e rëndësisme.
