Pavarësisht nëse ke qenë viktimë e “ghosting” apo e ke bërë vetë, me siguri e di mirë se çfarë është: kur dikush zhduket papritur nga një marrëdhënie pa asnjë paralajmërim, duke lënë tjetrin të pyesë çfarë ndodhi. Por nëse ke menduar se kjo është gjëja më e keqe që mund të ndodhë, ndoshta s’ke dëgjuar për “evoluimin” e këtij fenomeni, të quajtur “zombing”.
Jo, nuk ka të bëjë me filmat e frikshëm për zombie, edhe pse emri të bën të mendosh menjëherë këtë. Në fakt, “zombing” ndodh kur një person që është zhdukur si fantazmë, pra ka bërë “ghosting”, papritur rishfaqet sikur të mos ketë ndodhur asgjë.
Me fjalë të tjera: u zhduk, pastaj “u ringjall” dhe u kthye përsëri në jetën tënde.
Pse ndodh kjo?
Sipas ekspertëve, arsyet janë të ndryshme, por më e zakonshmja është papjekuria emocionale. Personi që e bën këtë shpesh e ka zhvendosur vëmendjen drejt dikujt tjetër, por kur mërzitet ose mbetet vetëm, kthehet tek ti si të mos ketë ndodhur asgjë.
Një arsye tjetër është mërzia. Sipas seksologes Marla Renee Stewart, njerëzit që “zombiesohen” shpesh e bëjnë këtë nga mërzia, sepse duan të rikthehen tek dikush që dikur u ka dhënë argëtim ose vëmendje.
Ndërsa psikologia Kate Balestrieri shpjegon se pas kësaj sjelljeje qëndron shpesh nevoja për vëmendje. Ata duan të shohin nëse ende kanë ndikim te tjetri. E përdorin këtë si mënyrë për t’u ndier sërish të vlefshëm kur janë pasigurt me veten. Ka edhe nga ata që rikthehen vetëm për të parë nëse tjetri është ende i lënduar apo mban mëri.
Si duhet të reagosh
Reagimi më i mirë ndaj “zombing”-ut është indiferenca.
Sigurisht, personi që kthehet do të ketë një justifikim “të mirë” për zhdukjen e tij, por varet nga ti nëse do ta pranosh apo jo. Kjo lloj sjelljeje tregon papjekuri dhe toksicitet, dhe njerëz të tillë nuk kanë vend në jetën tënde.
