22-vjeçari që vrau Charlie Kirk i rrëfeu krimin shokut të dhomës/partnerit: “U mbush kupa me urrejtje”

Credit : Andrew Harnik/Getty; Utah County Sheriff's Office

Tyler Robinson, 22-vjeçari i akuzuar për vrasjen e Charlie Kirk, ka lënë pas një sërë mesazhesh për shokun e dhomës dhe partnerin e tij, në të cilat duket se ka pranuar krimin, tha të martën Prokurori i Qarkut të Utah, gjatë njoftimit të akuzave.
 
Zbulimet u bënë publike të martën, kur Prokurori i Qarkut, Jeff Gray, shpalli 7 akuza ndaj që rëndojnë ndaj Tyler Robinson. Më e rënda është akuza për vrasje, e cila mund t’i shkaktojë të riut dënim me vdekje, nëse shpallet fajtor.

Sipas Jeff Gray, shoku i dhomës i Tyler,  i cili është në proces tranzicioni nga burrë në grua dhe me të cilin ai kishte një lidhje romantike, mori një mesazh nga 22-vjeçari më 10 shtator, pas vrasjes së Charlie Kirk në universitetin Utah Valley në Orem, ku shkruhej: “Shih poshtë tastierës sime.”

Atje, shoku i dhomës gjeti një shënim që shkruante: “Kisha mundësinë ta hiqja qafe Charlie Kirk dhe e bëra,” sipas dokumentit të akuzës.

Shoku i dhomës e pyeti 2 herë partnerin nëse e kishte seriozisht dhe Tyler i tha se po dhe se ishte penduar që e përfshiu në këtë ngjarje, pasi kishte në plan ta mbante vrasjen sekret deri në vdekje.

I pyetur pse e vrau aktivistin e ekstremit të djathtë, Tyler dyshohet se u përgjigj:

“M’u mbush kupa me urrejtjen e tij. Me disa lloje urrejtjesh nuk mund të bëhet kompromis”.

Tyler dyshohet se nisi t’i dërgonte mesazhe shokut të dhomës ndërsa ishte ende në Orem dhe kishte ndërmend të merrte armën e familjes, të cilën më vonë e përdori për të vrarë Charlie Kirk. Ai përshkroi ankthin që përjetoi për ta marrë dhe fshehur armën, si dhe më tej, se ishte i shqetësuar për gjurmët që kishte lënë.

“Si do ia shpjegoj babit vdekjen e Charlie Kirk?” – i shkroi ai partnerit, të cilin e përshkroi si fans të madh të lëvizjes “Make America Great Again”, fushatën që mbështeste zellshëm Kirk.

Në fund, ai i tha partnerit se do të dorëzohej, pasi prindërit e identifikuan nga kamerat e sigurisë dhe një sherif, mik i familjes, e bindi të dorëzohej.

“Ti je e vetmja për të cilën shqetësohem, e dashur,” dyshohet se i shkroi Tyler mikut të dhomës, i cili i tha se ishte shumë i shqetësuar.

Më pas, Tyler i kërkoi të mos fliste me median dhe e mbylli mesazhin duke u shprehur se do të qëndronte i heshtur dhe do të merrte një avokat.

Shoku i dhomës, emri i të cilit nuk është bërë publik, po bashkëpunon plotësisht me autoritetet.

Charlie Kirk, komentatori konservator amerikan dhe themelues i organizatës “Turning Point USA” (e cila kishte për qëllim promovimin e ideve konservatore midis studentëve dhe të rinjve), ndërroi jetë në moshën 31-vjeçare pas një sulmi me armë gjatë një ngjarjeje publike në Utah.

Kirk, i martuar dhe baba i dy fëmijëve të vegjël, njihej për qëndrimet e tij politike të forta dhe për ndikimin e tij mes të rinjve konservatorë në Shtetet e Bashkuara.