Astronomët në mbarë botën po ndjekin me vëmendje 3I/ATLAS, një objekt të pazakontë që vjen nga një tjetër sistem diellor dhe që po ngre shumë pikëpyetje në komunitetin shkencor.
Ai ka karakteristika krejt ndryshe nga kometat apo asteroidët që njihen deri më sot, përfshirë shpejtësinë, përbërjen dhe drejtimin e lëvizjes, çka i ka bërë disa ekspertë të marrin në konsideratë edhe mundësinë e origjinës artificiale.
Fushata ndërkombëtare e studimit, që drejtohet nga International Asteroid Warning Network, do të zgjasë nga nëntori 2025 deri në janar 2026. Qëllimi është të kuptohet nëse 3I/ATLAS është një fenomen natyror apo diçka shumë më e avancuar.
Profesori i Harvardit Avi Loeb, i njohur për projektin “Galileo”, thotë se edhe pse gjasat që objekti të ketë lidhje me inteligjencë jashtëtokësore janë të vogla, “rreziku që mbart është shumë i madh për t’u injoruar”.
Sipas të dhënave të para, objekti ka një trajektore tepër të rrallë, një re gazi me përmbajtje të lartë nikeli dhe shumë pak ujë, diçka që nuk është parë më parë tek trupat qiellorë.
3I/ATLAS do të kalojë më afër Tokës më 19 dhjetor 2025, dhe shkencëtarët shpresojnë se gjatë asaj periudhe do të mund të zbulojnë më shumë për origjinën e tij.
Nëse do të rezultojë një kometë e zakonshme apo diçka që sfidon kufijtë e njohurive njerëzore, mbetet për t’u parë, por një gjë është e sigurt: bota e shkencës nuk e ka parë kurrë më parë një vizitor si ky.
Burimi: The Economic Times
