Pak ditë më parë ju njohëm me Nas Daily-n, blogerin e famshëm të cilit i ra rruga në Shqipëri. Deri më tani ai ka realizuar dy video këtu, ku njëra flet për historinë Dianës.

“A e dini?! Në Ballkan dhe në rajonet e thella të Shqipërisë, shumë gra të guximshme donin dhe duhej të merrnin të drejta si burrat. Por, për shkak se ishin gra, nuk mundeshin. Kështu ato bënë betimin dhe u kthyen në burrnesha; fizikisht gra, por me një stil jetese si burrat. Kjo është historia magjepsëse e njërës prej atyre,” shkruan ai në videon e postuar në Facebook.

“[Gratë] trajtoheshin shumë keq,” shprehet Diana, e cila vendosi të kishte të njëjtat të drejta si burrat – vishej si ata, punonte si ata, bëri ushtrinë dhe shërbeu në forcat policore për 35 vite edhe pse është ende grua. “Sot jam më e fortë se një burrë”, thotë ajo.

Kjo traditë nuk praktikohet më, pasi gratë s’kanë pse dhe s’duhet të shndërrohen në burra për të patur të drejtat që meritojnë, megjithatë është një dëshmi për trimërinë e Dianës dhe shumë grave të tjera shqiptare mbi barazinë gjinore.

Në një tjetër video, Nas trajton numrin e madh të kafeneve në Shqipëri dhe njëkohësisht mikpritjen vendase: “Nëse kafeja e lirë nuk ju bind ta vizitoni Shqipërinë, ndoshta do t’ju bëjnë njerëzit.”

Blogeri do të jetë i ftuar në një ndër puntatat e ardhshme të “Xing me Ermalin”.