E nisëm si një pyetje sa për zbavitje, por përfunduam me një artikull që nuk e kishim planifikuar. Në @anabel.entertainment në Instagram pyetëm ndjekësit tanë: “Nëse një ditë në një lajm për ju do të shkruhej: ‘E pabesueshme! Jetoi në paqe e lumturi 100 vjet duke ngrënë çdo ditë vetëm…’, cili do të ishte ushqimi?”
View this post on Instagram
Komentet nisën shpejt dhe ishin po aq të shumëllojshme sa edhe njerëzit që i shkruan. Çokollatë, ëmbëlsira, kafe, makarona, pilaf, briosh. Ushqime që i duam, që na ngushëllojnë, që i lidhim me kënaqësi të vogla të përditshme. Por mes gjithë këtyre përgjigjeve që tingëllonin si menu dëshirash, një fjalë nisi të përsëritej në mënyrë të çuditshme. Kos, “në 97% të rasteve, kos”, “kos dhe djathë”, “vetëm kos”. Pse kaq shumë njerëz e imagjinojnë veten duke jetuar gjatë falë kosit?
Kosi, ndryshe nga çokollata apo makaronat, nuk premton shije të jashtëzakonshme. Ai ka një shije të këndshme, por deri-diku neutrale. Por ndoshta pikërisht këtu qëndron forca e tij. Është ushqimi që nuk të tradhton kurrë. Kur stomaku nuk ndihet mirë, kur ke ngrënë shumë, kur nuk di çfarë të hash, kosi është gjithmonë zgjedhja më e sigurt. Përmban probiotikë, bakteret e mira që ndihmojnë tretjen dhe kur trupi gjen diçka që e bën të ndihet mirë, e mban mend.
Zorrët dhe truri janë më të lidhur nga sa mendojmë dhe ushqimet që ndihmojnë tretjen shpesh ndikojnë edhe në mënyrën si ndihemi emocionalisht. Kosi nuk është thjesht “i lehtë”, por edhe qetësues. Për disa, është ushqimi që stabilizon jo vetëm stomakun, por edhe gjendjen.
Pastaj ndikon edhe faktori kulturor. Për shumë prej nesh, kosi nuk është diçka që u zbulua së fundmi si “superfood”. Ai ka qenë gjithmonë aty. Rritesh me të dhe, pa e kuptuar, bëhet pjesë e rutinës tënde. Dhe rutinat funksionojnë, zakonisht nuk i braktisim.
Në një kohë kur ushqimi shpesh ndahet mes “shumë i shëndetshëm, por pa shije” dhe “shumë të shijshëm, por i pashëndetshëm”, kosi është zgjedhja e duhur. Për shumë njerëz ai është ushqimi i sigurt, ai që nuk shkakton dilema dhe nuk shkakton frikë për disa kilogramë më shumë.
Ndoshta kosi nuk është ushqimi që do ta postonim me krenari çdo ditë në Instagram, por është ai që na shpëton më shpesh se të gjithë të tjerët. Nuk ka nevojë për marketing, është thjesht aty, duke bërë punën e vet.
Prandaj, kur imagjinojmë një jetë të gjatë, nuk shohim makarona, çokollata apo brioshë, por diçka më të thjeshtë, më të besueshme, më të përditshme. Shohim kosin.
