Çiljeta Xhilaga, e ftuar në podkastin “Zë me Mirën”, foli ndër të tjera për gruan e ndjerë të partnerit të saj, Alban Hoxhës. Ndonëse këngëtarja nuk e kishte idenë se kush ishte Albani dhe se ç’histori kishte ai, sërish kur dëgjoi se e shoqja ndërroi jetë, ajo e ka përjetuar disi humbjen e saj.
Lajmi, asokohe qarkulloi kudo dhe Çiljeta rrëfeu se ishte në parukerinë e së ëmës. Megjithëse s’e mban mend fiks se ç’ndjesi përjetoi asokohe, ajo thotë se doli të pinte një cigare për shpirtin e ndjerë të saj.
“Kur ka ndodhur historia e Albanit, mbaj mend që kam lexuar gazetat dhe nuk e njihja fare Albanin. Nuk e kisha haberin kush ishte, se nuk marr vesh fare nga sporti. Isha te parukeria e mamit. Kam marrë një cigare në dorë dhe kam thënë: “Po dal të pi një cigare për shpirtin e kësaj vajze”, tha ajo.
Pas disa vitesh, Çiljeta dhe Albani u lidhën dhe sot bashkëjetojnë. Këngëtarja po rrit me dashuri dhe pa asnjë dallim të birin e kësaj gruaje të ndjerë, e cila ndërroi pas një hemorragjie cerebrale, 16 ditë pas lindjes. Beko lindi në vitin 2014 dhe sot ka edhe një vëlla tjetër, Ferndandon, djalin e Çiljetës.
Gjatë qëndrimit të saj në “Ferma VIP”, Çiljeta, me sytë që i shkëlqenin, ka folur shpesh për çunat e saj dhe është shprehur se Beko i ngjan kryekëput të ëmës së ndjerë.
“Ai është kopje si mami i vet. Ka një fytyrë engjëlli që shkëlqejnë, i qeshin sytë”, tha këngëtarja, duke emocionuar publikun.
Më parë, ajo takoi edhe djemtë e saj, në një surprizë të organizuar gjatë spektaklit të “Ferma VIP” dhe të gjithë pamë se ajo i trajtonte dhe shprehte dashurinë në të njëjtën mënyrë për të dy djemtë.
Artikuj të sugjeruar:
