Kur do marrë fund kjo dramë? Kurrë!
Blake Lively ka paraqitur një kërkesë për gjykatën, në mënyrë që të lëshohet një “urdhër mbrojtjeje” kundër aksesit që Justin Baldoni ka në mesazhet e saj me Taylor Swift.
Aktorja e “Age of Adaline” paraqiti dokumente para gjyqtarit të New York-ut, Lewis J. Liman, i cili ka mbikëqyrur çështjen deri më tani, duke pretenduar se përpjekjet e regjisorit dhe ekipit të tij për të siguruar bisedat e saj me këngëtaren, qëllimisht përdoren si “taktikë” për të shfrytëzuar Swift-in dhe fansat e saj.
Sipas dokumenteve të siguruara nga Page Six, Blake Lively deklaron se komunikimi i saj me Taylor “nuk ka të bëjë” me padinë që ajo ka ngritur kundër aktorit dhe që mesazhet “janë të parëndësishme” për pretendimet e kompanisë Wayfarer.
“Gjatë procesit gjyqësor, veçanërisht gjatë muajit të kaluar, palët e Wayfarer e kanë përdorur vazhdimisht emrin e znj. Taylor Swift si pjesë të strategjisë së tyre mediatike”, thuhet në dokument.
Ndërsa ekipi i Baldoni-t hoqi dorë nga hetimi i tyre për Taylor dhe miqësinë e Blake Lively-t me të, duke pretenduar që i kishin siguruar informacionet që u nevojiteshin — ekipi i Lively-t i tha gjyqtarit se ndjekja e mëtejshme do të ishte “e panevojshme, e tepruar dhe e paarsyeshme.”
“Justin Baldoni dhe palët e Wayfarer po vazhdojnë të kërkojnë qasje në komunikimet private të Taylor Swift — pavarësisht se më parë deklaruan se ‘i kishin marrë të gjitha informacionet që u nevojiteshin,'” tha për Page Six zëdhënësi i Blake.
“Siç pasqyrohet edhe nga dokumentet e dorëzuara sot, qëllimi i tyre për të tërhequr Taylor Swift-in në këtë çështje ishte i dukshëm që nga gushti 2024, kur ekipi i tij, i udhëhequr nga Melissa Nathan, e përfshiu emrin e saj në dokumentin e tyre”.
Deklarata përfundon: “Përpjekjet e vazhdueshme për të përdorur sërish yllin më të madh të botës si taktikë PR-i pasqyrojnë një shthurje publike të përmasave epike — dhe shërbejnë vetëm për të larguar vëmendjen nga fakti që paditë e Justin Baldoni-t kundër Blake Lively, Ryan Reynolds, publicistit të tyre dhe The New York Times, u hodhën poshtë.”
Regjisori, 41 vjeç, fillimisht e përfshiu këngëtaren pop në betejën e tij ligjore me Blake Lively-n në janar, kur ai ngriti një kundërpadi 400 milionë dollarëshe ndaj aktores “A Simple Favor” dhe bashkëshortit të saj, Ryan Reynolds. Avokati i tij, Bryan Freedman, pretendoi se Taylor ishte e pranishme në një takim të rëndësishëm mes dy aktorëve.
Ai po ashtu deklaroi se ylli i “Gossip Girl”, 37 vjeçe, përdori miqësinë e saj me Swift-in si armë për të marrë nën kontroll xhirimet e filmit.
Megjithatë, në një vendim paksa shokues, padia e regjisorit kundër çiftit të njohur u hodh poshtë nga gjyqtari i çështjes— po ashtu edhe padia e tij 250 milionë dollarëshe për shpifje kundër The New York Times. Si Blake, ashtu edhe The New York Times e përshëndetën vendimin e gjykatës, ndërsa Justin ka ende kohë për të mbledhur prova të mjaftueshme për të ngritur një tjetër padi.
