Gjatë performancës së saj natën e parë të Festivalit të Këngës, Sheila Haxhiraj kishte si pjesë të kostumografisë një aksesor që i përngjante shqiponjës, vendosur pranë njërit sup. Prej pamjes realiste të tij, njerëzit kritikuan Sheilën për atë zgjedhje aksesori, duke menduar se ishte krijuar me pjesë të vërteta të trupit të ndonjë shpendi, apo se ishte një zog i vërtetë e i balsamosur.
Megjithatë, Sheila sqaroi poshtë një postimi të saj, ku në foto tregonte procesin e krijimit të shqiponjës, se si qëndronte e vërteta:
"Një sqarim i vogël, me dashuri. Për të gjithë ata që më kanë pyetur për zogun në performancë: zogu nuk është i vërtetë dhe nuk është i balsamosur. Është thjesht një aksesor artistik.
E kam përdorur në mënyrë simbolike, për të shprehur lirinë, forcën dhe autenticitetin, ashtu siç e ndiej unë figurën e shqiponjës në interpretimin tim artistik."
Më tej, këngëtarja theksoi se nuk do lëndonte asnjëherë vërtet një kafshë për veshjen e saj skenike dhe përsëriti se ishte thjesht një formë shprehjeje për artin e saj:
"Dua ta theksoj shumë qartë: unë jam një njeri që i do dhe i mbron kafshët. Kush më njeh personalisht e di sa e rëndësishme është kjo për mua.
Më vjen sinqerisht keq që kjo është keqinterpretuar nga disa, sepse qëllimi im nuk ka qenë kurrë të dëmtoj apo të lëndoj asnjë krijesë, por vetëm të shprehem përmes artit."
View this post on Instagram
