Eliona Pitarka u përfshi në qendër të vëmendjes pas një videoje që postoi në Instagram, ku iu bashkua trendit më të fundit të rrjeteve sociale, #NickiMinajChallenge. Në video, ajo shfaqet duke pozuar me taka mbi një tenxhere, me vajzën 1-muajshe në krah, ndërsa i jep gji dhe në të njëjtën kohë mban një shishe.
Videoja u bë virale brenda pak orësh dhe ndau ndjekësit në dy “kampe”. Disa e vlerësuan për guximin dhe për mënyrën si portretizoi forcën e nënave në jetën reale. Pati njerëz që komentuan “Më thuaj diçka që nuk e bën një mama?” dhe “Kush e drejton botën? Mamatë!”, të cilët e panë këtë moment si një përfaqësim të supergrave moderne.
Por nga ana tjetër, pati edhe komente të ashpra që e cilësuan veprimin si të pamatur dhe të rrezikshëm për një foshnje të vogël. “Me gjithë respektin, kjo nuk është për t’u mburrur. Faleminderit Zotit që nuk ndodhi asgjë, por nëse rastësisht do të bije, kjo foshnjë në këtë moshë kaq të vogël mund të pësonte dëmtime të brendshme dhe të jashtme për gjithë jetën,” shkruan dikush.
“Sa budallallëk dhe sa e rrezikshme. Sjellje narciste që vë mbi gjithçka dëshirën për vëmendje, duke rrezikuar sigurinë e një të porsalindure,” lexohet në një tjetër koment. “Mendo mirë para se të veprosh, sepse një gabim mund të ndryshojë gjithçka.”
Duke parë reagimet, Eliona vendosi të përgjigjet publikisht, përmes një fotoje të vajzës së saj ku shkruan:
“E kuptoj që duket e frikshme - një bebe mbi tavolinë dhe një mama me taka, por njerëz mos harroni, përpara se të shqetësoheni për një tavolinë dhe një pozë me taka, kujtoni që mama ime ka vite që ngre pesha më të rënda se unë dhe s’ka lënë palestër pa shkelur. Gjithashtu të dyja bashkë kemi ngritur shtanga çdo muaj të shtatzënisë. Prandaj, ju lutem, pak respekt për një supermama të certifikuar! Relaksohuni, më rrezikon më shumë ndonjë koment i pavend sesa balanca e mamit mbi tavolinë!”
Më tej, shton:
“Mama ime ka bërë plank-e me barkun te goja, kështu që një qëndrim mbi taka mbi tavolinë? E thjeshtë.”
