Modelja e dashur Emily Ratajkowski është gjithmonë burim frymëzimi për ndjekësit e saj, qoftë për stilin, apo look-un gjithmonë të kuruar. Ajo di si ta “përqafojë” çdo trend dhe ta personalizojë atë.
Së fundmi, Emily tërhoqi sërish vëmendjen me një paraqitje tërësisht verore, që dukej sikur vinte direkt nga Rivierat e Europës. Gjatë Festivalit të Filmit në Kanë, ajo u shfaq duke xhiruar një video promovuese, veshur me një set ngjyrë kafe. Por ajo që i dha vërtet “jetë” pamjes ishte mënyra si kishte stiluar flokët: onde dhe një shall mëndafshi të mbështjellë rreth kokës, një stil klasik dhe elegant.
Ky model flokësh, dikur shumë i dashur për ikonat e Hollywood-it si Audrey Hepburn, po përjeton një rikthim të vërtetë. Sekreti i këtij stili qëndron tek kaçurrelat që duken “të pakuruara”, por në fakt janë krehur me kujdes për të krijuar një version sa më natyral.
Shalli prej mëndafshi dhe syzet e mëdha të diellit e plotësonin pamjen, duke i dhënë asaj një prekje të viteve '50, si të ishte protagoniste e një filmi klasik.
Një aksesor si ky shall është një mënyrë e thjeshtë dhe efektive për t’i dhënë stil një modeli të zakonshëm flokësh, sidomos gjatë ditëve të ngrohta.
Pra, nëse ju mungon një detaj në pamje, një shall i tillë mund të jetë ai "aksesor magjik" që transformon gjithë look-un tuaj.
