Karim Adeyemi, sulmuesi i Borussia Dortmund dhe i kombëtares gjermane, është gjobitur me 450 mijë euro pas një urdhri penal të lëshuar nga Gjykata e Wetter, pasi autoritetet gjetën në makinën e tij armë të ndaluara, mes tyre një shkop metalik goditës dhe një pajisje elektro-impulsi.
Sipas raportimeve të medias gjermane (tabloid) BILD, çështja nuk do të shkojë në gjyq publik, pasi urdhri penal është bërë tashmë i formës së prerë. Prokuroria konfirmoi se procedura është mbyllur, ndërsa avokati i futbollistit tha se pajisjet ishin marrë rastësisht përmes një “kutie misteri” të porositur online, pa dhënë shpjegime të tjera.
Federata Gjermane e Futbollit ka sqaruar për SportBild se nuk do të marrë masa sportive kundër Adeyemit, edhe pse trajneri Julian Nagelsmann dhe drejtues të tjerë të federatës janë takuar me futbollistin për të diskutuar situatën. Lojtari do të ketë një shënim administrativ në regjistrin qendror, por nuk konsiderohet i dënuar penalisht sipas sistemit gjerman, pasi gjoba nuk kalon pragun që e shndërron në precedent penal.
BILD ka përmendur gjithashtu edhe partneren e tij, Loredanën, duke e përshkruar çiftin si një dyshe me stil jetese luksoz që ka tërhequr vëmendje të madhe në Gjermani.
Sipas disa mediave lokale, periudha kur u krye kontrolli lidhej me një udhëtim të çiftit në Greqi gjatë verës së vitit 2024, megjithëse nuk ka asnjë provë se ajo është pjesë e hetimit apo ka rol në akuzat.
