Pas shumë dekadash luftë për barazi, gratë më në fund kanë thyer shumë tabu. Sot, ato mbajnë pozita të rëndësishme dhe marrin paga të larta. Njohim të gjithë gra me karriera të shkëlqyera, që sfidojnë hapur stereotipet gjinore, udhëheqin borde drejtuesish, apo janë CEO të kompanive të ndryshme.
Shpesh mendojmë se nuk na duhet më të mbështetemi te burrat për ushqim apo strehim. I kemi arritur të gjitha, apo jo?
Po, është fantastike. Por përkundër gjithë këtyre arritjeve frymëzuese, të cilat supozohet se do të na bënin më të sigurta dhe më të lumtura, një studim i fundit tregon se gratë e fuqishme dhe të arsimuara janë shumë më të prira ndaj depresionit sesa kolegët e tyre meshkuj. Po, është zhgënjyese.
Çfarë po ndodh?
Sipas kërkimeve, gratë me tipare autoritare janë më të ekspozuara ndaj depresionit krahasuar me burrat që kanë të njëjtat tipare.
Një studim nga Shoqata Amerikane e Sociologjisë analizoi jetën dhe punën e 1,300 burrave dhe 1,500 grave gjatë viteve 1993–2004. Ata ndoqën ecurinë e karrierës së pjesëmarrësve dhe ndryshimet emocionale që e shoqëruan këtë rrugëtim.
Rezultatet ishin befasuese: pavarësisht pozicioneve të larta dhe sinjaleve të forta për shëndet të mirë mendor, gratë kishin më shumë gjasa të zhvillonin depresion.
Ndërsa burrat, përkundrazi, dukeshin krejtësisht në paqe.
Arsyeja? Përsëri, pritshmëritë gjinore.
Siç shpjegon autorja kryesore e studimit, Tetyana Pudrovska:
“Vite të tëra kërkimi në shkencat sociale tregojnë se gratë në pozita autoriteti përballen me tensione ndërpersonale, ndërveprime negative, stereotipe të padrejta, paragjykime, izolim social dhe rezistencë, si nga vartësit, ashtu edhe nga kolegët dhe eprorët. Njerëzit i shohin gratë në pozita drejtuese si të papërshtatshme për udhëheqje, si mungesë vetëbesimi apo ashpërsi që ‘nuk përputhen me feminitetin’. Kjo krijon stres kronik.”
Problemet që lidhen me barazinë gjinore nuk janë zhdukur, thjesht janë bërë më të sofistikuara. Dhe mënyra e vetme për t’i luftuar këto sfida është t’i emërtojmë, t’i diskutojmë dhe t’i sfidojmë hapur.
Gratë nuk duhet të vuajnë emocionalisht dhe mendërisht vetëm sepse kanë ambicie dhe talent për të arritur sukses.
Pudrovska shpreson që gjetjet e studimit të saj do t’i ndihmojnë kompanitë dhe institucionet të marrin masa konkrete për të lehtësuar shkaqet e depresionit te gratë në pozita të larta. Sepse shëndeti mendor ka rëndësi dhe duhet të jetë pjesë e çdo bisede në vendin e punës.
Burimi: Your Tango
