Foto: Gordon Ramsay, Brooklyn Beckham, Nicola Peltz

Të gjithë duket se kanë diçka për të thënë mbi sjelljen e Brooklyn-it ndaj prindërve të tij, edhe pse David-i dhe Victoria ende nuk kanë zgjedhur të reagojnë. Gordon Ramsay dhe familja e tij morën pjesë në dasmën e Brooklyn Beckham dhe Nicola Peltz, por me sa duket ai ka zgjedhur të mbajë anën e David-it dhe Victoria-s në këtë konflikt.

Gordon Ramsay mendon se Brooklyn Beckham është “i dëshpëruar për të gjetur rrugën e vet” në martesën e tij me Nicola Peltz, gjë që e ka çuar në përplasje të mëdha publike me prindërit e tij, David Beckham dhe Victoria Beckham. Gjatë promovimit të serialit të tij të ardhshëm në Netflix, Gordon Ramsay tha për The Sun se shkaktari kryesor i sjelljes moskokçarëse të Brooklyn-it është dashuria. 

“Është e vështirë, apo jo, kur je i fiksuar pas dikujt? Dashuria të verbon. E thonë për një arsye.”

Shefi i kuzhinës e pranoi se kjo është një “situatë e vështirë” për Brooklyn-in dhe pjesën tjetër të familjes Beckham.

“Ai është i dëshpëruar për të qëndruar në këmbët e veta, pa mbështetjen e familjes. Është i vendosur të krijojë rrugën e tij dhe unë e respektoj këtë te Brooklyn, është gjë shumë e mirë. Por kujto nga vjen. Dhe sinqerisht, një ditë nuk do t’i kesh më prindërit dhe duhet ta kuptosh këtë.”

Ai tha se Victoria është e mërzitur dhe me të drejtë. Më tej, ai foli për marrëdhënien e Brooklyn-it me të atin.

“E di mirë se sa shumë David e do Brooklyn,” vazhdoi ai.

Ndryshe nga shumë të tjerë, Gordon Ramsay mbetet shpresëplotë se kjo situatë do të zgjidhet. Sipas tij, edhe nëse Brooklyn nuk bën hapin e parë, David do të bëjë patjetër diçka për ta rregulluar marrëdhënien.

“I kam parë nga afër sa prindër të mirë janë. David si baba është i jashtëzakonshëm. Të dy kanë investuar shumë energji te fëmijët dhe e di sa herë e kanë nxjerrë Brooklyn-in nga telashet.”

Ai e përfundoi duke i kërkuar Brooklyn-it të kujtojë nga vjen dhe sakrificat që prindërit kanë bërë për të.

“Mendoj se është çështje kohe para se Brooklyn të reflektojë dhe të kuptojë sa të rëndësishëm janë prindërit e tij për të. Thjesht dua që Brooklyn të marrë pak kohë për veten dhe të kujtojë: je gjysma e mamit dhe gjysma e babit. Je një djalë i mrekullueshëm. Por ata kanë bërë për ty më shumë se kushdo në jetën tënde. Koha do të shërojë çdo gjë dhe David-i do ta rikthejë patjetër atë marrëdhënie.”

Nga ana tjetër, Brooklyn duket se nuk i ka mirëpritur këto fjalë dhe e ka hequr menjëherë nga lista e ndjekësve në Instagram, ndonëse Gordon Ramsay vazhdon ta ndjekë ende.

Në janar, Brooklyn publikoi një deklaratë të ashpër ndaj familjes, duke u shprehur në rrjetet sociale se nuk dëshironte të pajtohej me familjen pas gjithë situatave që kishin kaluar.