Brooklyn Beckham ka ndarë për herë të parë arsyet pse zgjodhi të shkëputej nga familja e tij. Në një rrëfim në Instagram ai ka shpjeguar secilën prej dramave e konflikteve brenda familjes, të cilat prej kohësh kishte dashur t'i mbante private.
"Kam qëndruar i heshtur për vite me radhë dhe kam bërë çdo përpjekje që këto çështje të mbeteshin private. Fatkeqësisht, prindërit e mi dhe ekipi i tyre kanë vazhduar t’i drejtohen medieve duke mos më lënë tjetër zgjidhje veçse të flas vetë dhe të them të vërtetën për disa nga gënjeshtrat që janë publikuar.
Nuk dua të pajtohem me familjen time. Nuk po më kontrollon [gruaja], po i dal zot vetes për herë të parë në jetën time.
Gjatë gjithë jetës sime, prindërit e mi kanë kontrolluar narrativën mediatike për familjen tonë. Postimet në rrjete sociale, ngjarjet familjare dhe marrëdhëniet jo të vërteta kanë qenë pjesë e pandashme e jetës në të cilën kam lindur. Së fundmi i kam parë me sytë e mi deri ku janë të gatshëm të shkojnë për të vendosur gënjeshtra të panumërta në media, kryesisht në kurriz të njerëzve të pafajshëm, vetëm për të ruajtur fasadën e tyre. Por, unë besoj se e vërteta gjithmonë del në pah."
Më tej ai u shpreh mbi mënyrën se si prindërit ndikuan në marrëdhënien e tij me bashkëshorten, Nicola Peltz.
"Prindërit e mi janë përpjekur pa pushim ta shkatërrojnë marrëdhënien time që para martesës sime dhe kjo nuk ka ndaluar. Nëna ime anuloi qepjen e fustanit të Nicola-s në minutën e fundit, pavarësisht se ajo ishte shumë e emocionuar të vishte krijimin e saj, duke e detyruar të gjente me urgjencë një fustan tjetër.
Javë para ditës sonë të madhe, prindërit e mi më ushtronin vazhdimisht presion dhe përpiqeshin të më mbushnin mendjen që të hiqja dorë nga të drejtat mbi emrin tim, gjë që do të ndikonte tek unë, te gruaja ime dhe te fëmijët tanë të ardhshëm. Ata këmbëngulnin që të firmosja para datës së martesës, sepse atëherë kushtet e marrëveshjes do të hynin në fuqi. Refuzimi im ndikoi në përfitimet financiare dhe që nga ajo kohë ata nuk më kanë trajtuar më njësoj.
Gjatë planifikimit të dasmës, nëna ime shkoi deri aty sa më quajti 'të ligë' sepse Nicola dhe unë vendosëm të përfshihnim në tavolinën tonë gjyshen time, Sandra-n, dhe gjyshen e Nicola-s, pasi të dyja nuk i kishin bashkëshortët e tyre. Të dy palët e prindërve kishin tavolinat e tyre njësoj ngjitur me tonën."
"Një natë para dasmës tonë, anëtarë të familjes sime më thanë se Nicola nuk ishte 'gjaku ynë' dhe 'nuk ishte familje'. Që nga momenti kur fillova të mbroj veten për familjen time, kam marrë sulme të pafundme nga prindërit e mi, si privatisht ashtu edhe publikisht, që u dërguan në medie me urdhrin e tyre. Madje edhe vëllezërit e mi u nxitën të më sulmonin në rrjete sociale përpara se të më bllokonin përfundimisht nga hiçi verën e kaluar.
Nëna ime vodhi vallëzimin tim të parë me gruan time i cili ishte planifikuar prej javësh me një këngë dashurie romantike. Përpara 500 të ftuarve tanë të dasmës, Marc Anthony më thirri në skenë, kur sipas programit duhej të ishte vallëzimi im romantik me gruan time, por në vend të saj nëna ime po priste për të vallëzuar me mua.
Ajo kërceu me mua në mënyrë shumë të papërshtatshme përpara të gjithëve. Nuk jam ndier kurrë më në siklet apo më i poshtëruar në gjithë jetën time. Ne donim të përsërinim betimet e dasmës për të krijuar kujtime të reja nga dita e martesës, që të na sillnin gëzim dhe lumturi, jo ankth dhe turp."
Gjatë rrëfimit ai tregoi se gruaja e tij, nuk ishte në asnjjë moment prej prindërve, gjë kjo që e përkeqësoi marrëdhënien mes tyre.
"Gruaja ime është disrespektuar rregullisht nga familja ime, pavarësisht se sa shumë jemi përpjekur të bëhemi njësh me ta. Nëna ime ka ftuar në mbledhje familjare vazhdimisht vajza që kanë qenë pjesë e së shkuarës time, qartësisht për të na bërë të dyve të ndihemi në siklet.
Pavarësisht kësaj, ne përsëri udhëtuam drejt Londrës për ditëlindjen e babait tim dhe u refuzuam prej tyre për një javë ndërsa qëndronim në dhomën e hotelit duke u përpjekur të kalonim kohë cilësore me të.
Ai refuzoi çdo përpjekje tonën, përveçse në festën e tij të madhe të ditëlindjes, që kishte qindra të ftuar dhe kamera në çdo cep. Kur më në fund ai pranoi të më takonte, ishte me kusht që Nicola të mos vinte. Ishte një shuplakë në fytyrë. Më vonë, kur familja ime udhëtoi drejt Los Angeles-it, ata refuzuan totalisht të më takonin."
"Familja ime vlerëson promovimin publik dhe mbështetjet e markave mbi gjithçka tjetër. Marka Beckham vjen e para.
'Dashuria' familjare përcaktohet nga sa poston në rrjete sociale ose sa shpejt heq dorë nga gjithçka për t’u paraqitur dhe për të pozuar për një foto familjare, edhe nëse kjo bëhet në kurriz të detyrimeve profesionale.
Për vite me radhë kemi bërë çmos për t’u shfaqur dhe për të mbështetur çdo sfilatë mode, çdo festë dhe çdo aktivitet mediatik për të treguar 'familjen tonë perfekte'.
Por, herën e vetme që gruaja ime kërkoi mbështetjen e nënës sime për të shpëtuar qentë e zhvendosur gjatë zjarreve në Los Angeles, nëna ime refuzoi."
Ndër të tjera sqaroi çdo lajm të rremë mbi bashkëshorten duke u shprehur se nuk kontrollohet prej saj, madje mes gjthë rrëmujës ndihet mjaft i lumtur me jetën tani.
"Narrativa se gruaja ime më kontrollon është plotësisht e kundërta. Unë jam kontrolluar nga prindërit e mi për pjesën më të madhe të jetës sime. Jam rritur me ankth të papërballueshëm. Për herë të parë në jetën time, që kur jam distancuar nga familja ime, ai ankth është zhdukur. Zgjohem çdo mëngjes mirënjohës për jetën që kam zgjedhur dhe kam gjetur paqe dhe lehtësim.
Unë dhe gruaja ime nuk duam një jetë të formësuar nga imazhi, shtypi apo nga manipulimi. Gjithçka që duam është paqja, privatësia dhe lumturia për ne dhe për familjen tonë të ardhshme."
