Pesë shtete kanë vendosur të bojkotojnë Izraelin, duke thënë se nëse vendi merr sërish pjesë në Eurovision, ato do të tërhiqen. Radiotelevizionet publike të Irlandës dhe Holandës njoftuan se nuk do të marrin pjesë në Festivalin Europian të Këngës vitin e ardhshëm nëse Izraeli lejohet të marrë pjesë.
“RTÉ mendon se pjesëmarrja e Irlandës do të ishte e pajustifikueshme përballë humbjes së vazhdueshme dhe të tmerrshme të jetëve në Gaza,” tha transmetuesi publik irlandez në një deklaratë, duke shtuar se ishte “thellësisht i shqetësuar nga vrasjet e qëllimshme të gazetarëve në Gaza.” (Komiteti për Mbrojtjen e Gazetarëve thotë se 197 gazetarë janë vrarë gjatë luftës; Izraeli ka thënë se disa prej tyre ishin pjesëtarë të Hamasit.)
Transmetuesi holandez AVROTROS njoftoi se Holanda nuk do të marrë pjesë në konkurs nëse Unioni Europian i Transmetuesve lejon Izraelin, i cili ka marrë pjesë që nga viti 1973, duke fituar katër herë.
“AVROTROS nuk mund ta justifikojë më pjesëmarrjen e Izraelit në këtë situatë aktuale, duke pasur parasysh vuajtjet e rënda dhe të vazhdueshme njerëzore në Gaza,” shkroi transmetuesi në një deklaratë.
Këto thirrje u bashkohen disa prej apeleve të bëra prej vendeve të tjera që po i bëjnë presion organizatorit të konkursit, Unionit Europian të Transmetuesve (EBU), që ta përjashtojë Izraelin, si akt proteste për shkak të luftës në Gaza.
EBU u ka rezistuar thirrjeve për ta ndaluar Izraelin, por tani përballet me një krizë, pasi Europa, si përmes institucioneve të saj të bashkuara, por edhe vetë shtetet, po shtojnë presionin ndaj Izraelit, që të shpallë armëpushimin dhe të përfundojë luftën, e cila nisi kur Hamasi sulmoi më 7 tetor 2023.
Radiotelevizionet në Slloveni, Spanjë dhe Islandë gjithashtu kanë sinjalizuar se mund të tërhiqen nga Eurovizioni nëse EBU nuk e përjashton Izraelin.
“Nuk mendoj se mund të normalizojmë pjesëmarrjen e Izraelit në ngjarje ndërkombëtare sikur të mos ketë ndodhur asgjë,” tha Ernest Urtasun, ministri i Kulturës së Spanjës, për “La Hora de La 1”.
“Në rastin e Eurovizionit, nuk është një artist individual që merr pjesë, por dikush që përfaqëson qytetarët e atij vendi”, shtoi ai.
Festivali supozohet të jetë krejtësisht pa lidhje me politikën, por për shumë izraelitë, Eurovision-i shihet si një tregues i statusit të tyre në skenën ndërkombëtare. Protestat kundër përfaqësuesit izraelitë ndiqen nga afër dhe, në dy vitet e fundit gjatë luftës, artistët që janë zgjedhur për ta përfaqësuar Izraelin kanë përfshirë simbole të qëndrueshmërisë në veshjet dhe tekstet e tyre. Gjithashtu, EBU ka përjashtuar Rusinë nga gara, pas pushtimit të Ukrainës, ndaj qëndrimi ndaj Izraelit është cilësuar si një “standard i dyfishtë”.
Në shpalljen e bojkotit të saj, AVROTROS përmendi gjithashtu “provat e ndërhyrjes” nga qeveria izraelite në konkursin e vitit 2025, duke iu referuar ankesave nga disa transmetues europianë që ngritën pyetje mbi fitoren e Izraelit në votimin e audiencës në maj.
Këngëtarja izraelite Yuval Raphael doli e dyta, pasi u mbështet nga vota popullore dhe mori pikë nga juritë e 14 vendeve.
EBU, më parë, kishte refuzuar presionin për të përjashtuar Izraelin, por më vonë hapi një proces për të mbledhur komente nga 37 vendet pjesëmarrëse të konkursit se si duhet të përballojë tensionet gjeopolitike. Martin Green, drejtori i konkursit, tha në një deklaratë se ky proces ishte ende në vijim.
“Transmetuesit kanë afat deri në mesin e dhjetorit për të konfirmuar nëse duan të marrin pjesë në ngjarjen e vitit të ardhshëm në Vjenë,” tha ai. “I takon secilit anëtar të vendosë nëse dëshiron të marrë pjesë në konkurs dhe ne do të respektojmë çdo vendim që ata marrin.”
Drejtori i përgjithshëm i transmetuesit islandez, RÚV, sinjalizoi se edhe pse deri tani EBU nuk i ka dëgjuar thirrjet për ta përjashtuar Izraelin, ai shpresonte për ndryshim.
“Mendoj se ka gjasa që nëse nuk ka ndryshim në qëndrimin e EBU-së dhe nuk u përgjigjet këtyre zërave shqetësues që vijnë nga ne, nga Spanja, Sllovenia dhe të tjerë, atëherë kjo do të kërkojë reagime nga këta transmetues,” tha ai. “Por le të presim dhe të shohim”, e përmbylli ai deklaratën.
Kujtojmë se Eurovision-i i vitit të kaluar u fitua nga JJ me “Wasted Love” (përfaqësues i Austrisë). Ai u shpall fitues me 79 pikë diferencë karshi Yuval Raphael, e cila përfaqësonte Izraelin me këngën “New Day Will Rise”.
Në total, Austria grumbulloi 436 pikë, një përmbledhje e votave të jurisë dhe publikut. Izraeli grumbulloi 357 pikë. Më tej, fituesi kërkoi që Izraeli të përjashtohej nga gara.
"Do të doja që Eurovision-i të mbahej vitin e ardhshëm në Vjenë dhe pa Izraelin. Por 'topi' është në duart e EBU-së. Ne, artistët, mundet vetëm të ngremë zërin për këtë çështje," tha këngëtari 24-vjeçar për “El Pais”.
Eurovision u zhvillua në Basel të Zvicrës, në tematikën “Welcome Home”, pas fitores së Nemo me këngën “The Code”, i cili vjet çoi në shtëpi pas fitores së Celine Dion në vitin 1988.
