Qeveria amerikane dështon në Senat
Qeveria e Shteteve të Bashkuara ka pezulluar shërbimet federale zyrtarisht në mesnatë, pasi Demokratët në Senat bllokuan një projektligj të fundit të Republikanëve për të zgjatur financimin federal edhe për shtatë javë të tjera.
Me vetëm 54 vende në Senat, Republikanët kishin nevojë për të paktën 60 vota për të kaluar ligjin, por arritën vetëm 55 pro dhe 45 kundër, çka nuk ishte e mjaftueshme për miratim.
Demokratët përdorën këtë situatë si formë negociuese për të arritur qëllimet e tyre politike, duke kërkuar zgjatjen e subvencioneve për kujdesin shëndetësor, përballë rritjes së çmimeve për qytetarët.
Ambasadori i Afrikës së Jugut gjendet i vdekur në Paris
Ambasadori i Afrikës së Jugut në Francë, Nkosinathi Emmanuel Mthethwa, është gjetur i vdekur të martën jashtë një hoteli shumëkatësh në Paris, konfirmojnë autoritetet lokale.
Prokuroria e Parisit ka nisur një hetim mbi vdekjen e 58-vjeçarit, i cili ishte raportuar si i zhdukur nga bashkëshortja e tij të hënën, pasi ajo kishte marrë një mesazh shqetësues nga ai.
Sipas prokurorisë, Mthethwa kishte prenotuar një dhomë në katin e 22-të të hotelit Hyatt Regency dhe dritarja ishte hapur me forcë.
Trump vendos tarifa të reja mbi drurin dhe mobiliet e importuara
Presidenti amerikan Donald Trump njoftoi të hënën vendosjen e tarifave të reja prej 10% për drurin e importuar dhe 25% për kuzhina, banjo dhe mobilie të tapetuara, përfshirë divanet dhe kolltukët.
Në deklaratën e tij, Trump tha se një hetim zyrtar kishte përfunduar se produktet prej druri po importohen në sasi dhe kushte të tilla që rrezikojnë sigurinë kombëtare të SHBA-së.
Sipas raportit, SHBA ka material të mjaftueshëm të papërpunuar, por importet kanë dëmtuar kapacitetin prodhues vendas, deri në atë pikë sa vendi mund të mos jetë në gjendje të përmbushë kërkesat për produkte druri që janë jetike për mbrojtjen dhe infrastrukturën kombëtare.
Portugalia miraton ligje më të ashpra për emigracionin
Portugalia miratoi të martën një paketë të re ligjesh më të ashpra për emigracionin, të cilat e bëjnë më të vështirë hyrjen dhe qëndrimin në vend. Ligji kaloi me votat e partive të qendrës së djathtë dhe të ekstremit të djathtë në Parlament.
Pasi Gjykata Kushtetuese rrëzoi versionin e mëparshëm në korrik, duke e cilësuar si tepër kufizues për familjet e emigrantëve, Parlamenti miratoi një tekst të rishikuar.
