Kosovë/ Mbahen zgjedhjet lokale në vend
Banorët e Kosovës sot do të votojnë për të zgjedhur krerët e komunave dhe anëtarët e këshillave komunalë në plot 38 komuna të vendit, për të vendosur se kush do t’i qeverisë në vijim.
Këto janë zgjedhjet e dyta brenda vitit në Kosovë. Më 9 shkurt u mbajtën zgjedhjet parlamentare, të cilat sollën edhe disa përplasje dhe debate politike. Sipas sondazheve, Prishtina do të paraqesë një garë shumë të fortë, një ndër më të ngushtat e dekadës, ku janë në konkurrim Përparim Rama (kryetari aktual); Hajrulla Çeku i Vetëvendosjes; Uran Ismaili i PDKS-së; Bekë Berisha nga AAK dhe Besa Shahini, PSD. Besa ka qenë edhe ministre e Edukimit dhe Sportit në Shqipëri.
Gaza/ Sqarohet nëse do të ketë ushtarë amerikanë në territor
SHBA ka marrë përsipër që të udhëheqë Qendrën e Koordinimit Civil dhe Ushtarak, e cila do të kontribuojë në organizmin dhe stabilitetin e Gazës. Duke qenë se në territorin e shkatërruar zbarkuan ushtarë amerikanë, u ngrit pretendimi se trupat e tyre do të ishin prezente në territor, por mesa duket, nuk do të ndodhë. SHBA nuk do të vendosë trupa në Gazë.
Konfirmimi erdhi nga Brad Cooper, admiral dhe komandant, pasi kreu një vizitë në një prej zonave të ushtrisë izraelite. Rikujtojmë se Hamasi dhe Izraeli kanë nënshkruar armëpushimin, për lirimin e pengjeve izraelite dhe përfundimin e një prej luftrave më të përgjakshme në Lindjen e Mesme.
Francë/ Rikthehet sërish në detyrë kryeministri, 4 ditë pas dorëheqjes
Sébastien Lecornu është rikthyer sërish në detyrë, duke surprizuar vendin dhe shtetet e ndryshme, pas deklaratave të shumta se “misioni i tij kishte mbaruar”. Emmanuel Macron e riemëroi në detyrë kryeministrin, pasi i kërkoi të përpiqej që të formonte një qeveri të re.
Ndonëse është ende e vagullt situata për qeverinë e re dhe funksionale, është e sigurt që Sébastien do të përballet me një presion të ri në parlament, lidhur me buxhetin e Francës për vitin e ardhshëm.
SHBA/ Viktima dhe të plagosur nga një sulm me armë zjarri
Katër persona kanë humbur jetën dhe 12 të tjerë janë plagosur, si pasojë e një sulmi me armë zjarri që ndodhi në Mississippi. 4 nga të plagosurit rezultojnë të jenë në gjendje të rëndë. Ngjarja ndodhi gjatë orëve të mesnatës në rrugën “Leland”.
Ende nuk ka informacione për personin që kreu krimin, apo ndonjë të dyshuar të mundshëm. Ndërkohë, sulme të tilla agresive janë shtuar në SHBA, duke lënë njerëzit të pasigurt dhe të frikësuar.
