Protestuesit në Milano kundër Lojërave Olimpike Dimërore “të paqëndrueshme” për mjedisin dhe ekonominë
Protestues në Milano dolën në rrugë në ditën e parë të Lojërave Olimpike Dimërore Milano-Cortina 2026, duke kundërshtuar ndikimin negativ që, sipas tyre, ky event ka pasur në mjedis dhe ekonomi.
Ata akuzuan qeverinë italiane dhe autoritetet lokale se kanë shpenzuar para publike për “një vitrinë”, ndërkohë që mungojnë fondet për shëndetësinë, arsimin dhe shërbimet sociale.
Protestuesit marshuan nëpër qytet, duke kaluar pranë Fshatit Olimpik të sapohapur, por edhe pse hodhën fishekzjarre dhe bomba tymi, protesta ishte në përgjithësi paqësore.
Netanyahu do të takohet me Trump-in në Washington të mërkurën për të diskutuar mbi Iranin
Kryeministri izraelit Benjamin Netanyahu do të takohet me presidentin e SHBA-së, Donald Trump, në Washington të mërkurën për të diskutuar zhvillimet e fundit mbi Iranin dhe programin e tij bërthamor.
Netanyahu kërkon që negociatat të përfshijnë edhe kufizimin e raketave balistike dhe ndërprerjen e mbështetjes iraniane për grupet militante në rajon.
Ndërkohë, ministri i Jashtëm iranian Abbas Araghchi, deklaroi se programi raketor nuk është i negociueshëm dhe theksoi se ekziston një mosbesim i thellë ndaj SHBA-së.
Zelenskyy tha se SHBA-të kanë vendosur afat deri në qershor për arritjen e një marrëveshje paqeje mes Ukrainës dhe Rusisë
Presidenti ukrainas Volodymyr Zelenskyy deklaroi se SHBA-të i kanë vendosur Ukrainës dhe Rusisë afat deri në qershor për arritjen e një marrëveshjeje paqeje.
Ai tha se administrata Trump ka propozuar që raundi i ardhshëm i bisedimeve trepalëshe të zhvillohet në SHBA, me shumë mundësi në Miami, dhe Ukraina e ka konfirmuar pjesëmarrjen.
Ai u tha gazetarëve se nëse afati i ri i qershorit nuk respektohet, Washingon-i ndoshta do të ushtrojë presion ndaj të dyja palëve për të arritur marrëveshjen.
Votuesit tajlandezë u drejtohen kutive të votimit, me tre partitë kryesore që synojnë formimin e qeverisë
Votuesit iu drejtuan kutive të votimit për zgjedhjet e përgjithshme, ku tre partitë kryesore garojnë për qeverinë, me Partinë e Popullit pro-demokracisë që kryeson sondazhet, por nuk pritet të fitojë shumicë absolute.
Kjo parti premton reforma strukturore, përfshirë rritjen e përgjegjshmërisë së ushtrisë, luftën kundër monopoleve të mëdha dhe korrupsionit, si dhe rishkrimin e Kushtetutës për ta bërë vendin më demokratik.
Zgjedhjet zhvillohen në një kohë paqëndrueshmërie politike dhe ekonomike, ndërsa një referendum shoqëron votimin për të vendosur nëse Kushtetuta e vitit 2017 duhet të rishkruhet.
