Martin Shkreli është përfshirë sërish në një çështje ligjore, këtë herë për një album muzikor jashtëzakonisht të rrallë, i cili ekziston vetëm në një kopje të vetme dhe nuk lejohet të publikohet për publikun deri në vitin 2130. Padia e re ka rikthyer në vëmendje një histori të pazakontë që përzien muzikën, paranë dhe skandalet ligjore.
Padia lidhet me albumin "Once Upon a Time in Shaolin", i krijuar nga grupi amerikan i hip-hop-it Wu-Tang Clan. Shkreli pretendon se i janë shkelur të drejta që, sipas tij, i përkisnin që nga momenti kur e bleu albumin vite më parë.
Por çfarë është ky album dhe pse është kaq i veçantë?
Në vitin 2015, Wu-Tang Clan krijoi një album ndryshe nga çdo tjetër: vetëm një kopje në botë, e menduar si një vepër arti. Artistët vendosën që albumi të mos publikohej dhe të mos shitej për dëgjim publik për 88 vjet, me idenë që muzika të trajtohej si art i rrallë, jo si produkt masiv.
Albumi u nxor në ankand dhe u ble nga Martin Shkreli për rreth 2 milionë dollarë. Në atë kohë, Shkreli ishte i përfshirë në një skandal, kur kompania e tij bleu të drejtat e ilaçit jetik Daraprim, që përdoret për trajtimin e një infeksioni serioz te pacientët me imunitet të dobët. Menjëherë pas blerjes, ai rriti çmimin nga rreth 13 dollarë në 750 dollarë për pilulë, duke e bërë trajtimin praktikisht të papërballueshëm për shumë pacientë.
Vendimi shkaktoi reagim të madh publik, i përforcuar edhe nga sjellja e tij provokuese dhe arrogante në media dhe rrjete sociale. Për këtë arsye, Shkreli u quajt gjerësisht “njeriu më i urryer në Amerikë”, një reputacion që e ndoqi edhe pas dënimit të tij për mashtrime financiare.
Çfarë ndodhi më pas me Shkrelin?
Në vitin 2017, Shkreli u dënua për mashtrim financiar. Si pjesë e dënimit, shteti amerikan i sekuestroi pasuritë, përfshirë edhe albumin unik. Që nga ai moment, Shkreli nuk ishte më pronar i tij.
Albumi u rishit nga autoritetet dhe përfundoi në duart e një grupi koleksionistësh digjitalë të quajtur PleasrDAO, të cilët e blenë për rreth 4 milionë dollarë. Ata kanë të drejtë ta shfaqin albumin vetëm në evente private apo ekspozita, por jo ta publikojnë lirshëm.
Pse u rikthye konflikti?
Në vitin 2024, Shkreli tentoi ta transmetonte albumin në internet, edhe pse nuk e zotëronte më. Ky veprim çoi në padi nga PleasrDAO. Tani, në vitin 2026, Shkreli ka hapur një padi të re, duke thënë se disa të drejta që iu premtuan fillimisht nga RZA dhe Clivaringz (anëtar dhe producenti i grupit të hip-hopit, Wu-Tang Clan) i janë shitur më vonë një pale tjetër.
Aktualisht, çështja është ende në proces dhe nuk ka një vendim përfundimtar. Ndërkohë, albumi mbetet i padëgjuar për publikun.
