Po, edhe monarkia spanjolle ka rënë pre e trendit “naked dressing” - një stil mode që përdor pëlhura transparente, prerje strategjike dhe ngjyra nude për të krijuar iluzionin e një trupi të zhveshur ose pjesërisht të zhveshur.
Mbretëresha Letizia, e njohur prej kohësh si një nga figurat më elegante të Europës, u shfaq së fundmi me një veshje që rikujtoi se stili nuk njeh kufij, madje as te anëtarët e familjeve mbretërore.
Letizia u shfaq me një bluzë gri që duket si e tejdukshme, po aq sa mund të konsiderohet e tillë pa kaluar vijën e “etikës mbretërore”. Bluza, me kopsa dhe jakën karakteristike me fjongo, ka një shkëlqim të hollë metalik që e bën të duket e lehtë, e freskët dhe tepër elegante.
Veshja nuk zbulonte asgjë të tepruar, megjithëse duket sikur lejonte një hije delikate të lëkurës, duke krijuar efektin modest të trendit “naked”.
Mbretëresha e futi bluzën brenda një fundi të zi prej lëkure me gjatësi mesatare - një look i pastër dhe modern. Pjesa tjetër e pamjes ishte po aq e kuruar: këpucë Tod’s Barretta, çantë Carolina Herrera Victoria Insignia, vëthë rrethorë prej ari.
Flokët i mbante të lëshuara dhe, kur u freskua, thjesht hodhi një pallto të zezë mbi supe, një lëvizje që e ktheu pamjen në super chic.
