Në foto: Andrew dhe Mbreti Charles

Mbreti Charles ndërmori hapin e jashtëzakonshëm të fillimit të procesit për t'i hequr vëllait të tij, Andrew-t, titujt mbretërorë dhe për ta dëbuar nga prona mbretërore në Windsor. Ky ishte vendimi më dramatik deri më tani për të shuar skandalin mbi lidhjet e Andrew-t me Jeffrey Epstein, trafikant dhe abuzues seksual.

Andrew, 65 vjeç, për 15 vjet është përballur me polemika të herëpashershme mbi miqësinë e tij me Epstein, të cilat u shtuan pas publikimit të librit me kujtime nga Virginia Giuffre, e cila pretendonte se Andrew e kishte sulmuar seksualisht si adoleshente.

Një foto ku shfaqet Andrew, Virginia Giuffre dhe Ghislaine Maxwell në cep.

Virginia Giuffre - të cilën princi pretendon se nuk e ka takuar kurrë - ndërroi jetë nga vetëvrasja në prill në moshën 41-vjeçare. Andrew ka mohuar vazhdimisht të gjitha akuzat kundër tij.

Familja e Giuffre tha në një deklaratë të enjten: “Sot, një vajzë e zakonshme amerikane, nga një familje e zakonshme amerikane, rrëzoi një princ britanik me të vërtetën dhe guximin e saj të jashtëzakonshëm.”

Në deklaratë, Pallati i Buckingham vuri në dukje se Andrew do të detyrohet të largohet nga rezidenca e tij dhe do të marrë mbiemrin e familjes. Princi Andrew tani do të njihet si Andrew Mountbatten Windsor. “Këto vendime konsiderohen të nevojshme, pavarësisht faktit se ai vazhdon të mohojë akuzat kundër tij,” njoftoi pallati.

Pavarësisht njoftimit, Andrew mbetet i teti në radhë për fronin britanik. Ky status mund të hiqet me legjislacion, por do të kërkonte pëlqimin e kombeve të Komonuelthit në të gjithë botën, gjë që do të kërkonte kohë.

"Madhëritë e Tyre dëshirojnë të bëjnë të qartë se mendimet e tyre kanë qenë dhe do të mbeten me viktimat dhe të mbijetuarit e çdo forme abuzimi,” shtoi Buckingham Palace në deklaratë.

Familja e Virgiania Giuffre tha në deklaratë se do të luftonin për të siguruar që bashkëpunëtorët e tjerë të Epstein të përballeshin me drejtësinë. “Motra jonë, fëmijë kur u sulmua seksualisht nga Andrew, nuk pushoi kurrë së luftuari për drejtësi për çfarë i kishte ndodhur asaj dhe të mbijetuarve të panumërt si ajo.”

Thirrjet që Andrew të përballet me drejtësinë vazhdojnë. Grupi anti-monarki Republic tha të enjten se kishte udhëzuar avokatët të nisnin një ndjekje penale private kundër Andrew-t “për akuzat për vepra penale seksuale dhe sjellje të pahijshme si person publik.”

Vajzat e Andrew-t, Princeshat Beatrice dhe Eugenie, do të mbajnë titujt e tyre pasi janë bijat e djalit të një sovrani - në përputhje me rregullat e përcaktuara nga Mbreti George V në vitin 1917.