Ndërsa bota vajton “princin e errësirës”, Ozzy Osbourne, Terence Butler po vajton “princin e se qeshurës”, mikun dhe bashkudhëtarin e tij në rrugëtimin e gjatë të Black Sabbath.
Vetëm disa javë pas mbylljes së koncertit të fundit të grupit legjendar rock, vokalisti Ozzy Osbourne ndërroi jetë në moshën 76-vjeçare, më 22 korrik. Në një ese për The Sunday Times, basisti, gjithashtu 76 vjeç, ndau prapaskena nga “57 vite miqësi të pabesueshme” me Ozzy-n, nga krijimi i grupit e deri te koncerti i lamtumirës.
Terence Butler, i cili e themeloi Black Sabbath në vitin 1968 së bashku me Ozzy Osbourne, kitaristin Tony Iommi dhe bateristin Bill Ward, e nisi homazhin duke treguar historinë e gjatë të tij dhe Ozzy-t me stadiumin Villa Park në Birmingham.
Të dy u rritën pranë stadiumit të futbollit në Birmingham. Në vitin 2024, ekipi i stadiumit, Aston Villa, ribashkoi grupin për një reklamë. (Para asaj reklame, Butler nuk e kishte parë apo folur me Ozzy-n që nga turneu i fundit i Black Sabbath-it, "The End", në 2017-ën).
“Prandaj ishte kaq domethënës që Ozzy dhe Black Sabbath ta mbyllnin udhëtimin tonë të gjatë, nga fillimi në 1968 deri te koncerti i fundit në Aston, në Villa Park, më 5 korrik,” shkroi ai.
Megjithatë, shtoi Terence: “nuk e kuptova atë natë se nuk do ta shihja më kurrë Ozzy-n.”
Ai shtoi se provat për koncertin e fundit nisën një muaj përpara, vetëm me Tony-n dhe Bill-in dhe në fillim ishin disi të vështira. “Pastaj erdhi momenti që Ozzy të na bashkohej,” shpjegoi ai.
“E dija që nuk ishte në gjendje të mirë shëndetësore, por nuk isha i përgatitur të shihja sa i dobët ishte,” kujtoi basisti, duke vijuar: “E ndihmuan të hynte në sallën e provës dy ndihmës dhe një infermiere. Përdorte një shkop e duke qenë Ozzy, shkopi ishte i zi dhe i zbukuruar me ar dhe gurë të çmuar.”
“Ai nuk foli shumë, përveç përshëndetjeve të zakonshme dhe kur këndoi, qëndronte ulur në karrige,” vazhdoi basisti.
“I kaluam këngët, por u pa që po e lodhnin pas gjashtë apo shtatë këngëve. Biseduam pak, por ishte shumë i heshtur krahasuar me Ozzy-n e dikurshëm.”
Por “pjesa më e çuditshme e atij koncerti,” zbuloi ai, “ishte fundi.”
“Zakonisht, të gjithë përqafoheshim dhe përkuleshim për publikun, por Ozzy ishte në fronin e tij dhe nuk e kishim menduar si ta përfundonim. Çfarë të bënim? Tony ia shtrëngoi dorën, unë i dhashë një ëmbëlsirë, por ishte një ndjesi e çuditshme të mbyllje historinë tonë në atë mënyrë. Do të kisha dashur më shumë kohë me Ozzy-n pas skene, por tani dëshirat nuk vlejnë”.
Miku i Ozzy-t ndau edhe më shumë detaje nga marrëdhënia e tij me këngëtarin e “Crazy Train”, përfshirë momentin e parë kur u takuan, që përkon edhe me formimin e Black Sabbath.
“Grupi, i njohur (fillimisht si Earth), ishte “udhëtimi më i pabesueshëm i jetëve tona”. Gjithçka filloi kur Osbourne mbërriti zbathur në derën e tij, dhe Butler pothuajse menjëherë i tha: “Dakord, je pjesë e grupit”.
Së bashku me Tony Iommi-n, 77 vjeç, dhe Bill Ward-in, 77 vjeç, katërshja “u bënë vëllezër të pandarë,” tha Terence Butler, duke shtuar se ata gjithmonë kujdeseshin për njëri-tjetrin. Midis tyre, sipas tij, “kishte gjithmonë një lidhje të padukshme”.
“Kaluam kohët më të mira dhe më të këqija; lidhja ishte e pathyeshme. Për mua, Ozzy nuk ishte “princi i errësirës”; ai ishte “princi i së qeshurës”. Gjithçka e kthente në shaka, ishte argëtues i lindur”, shkroi Terence Butler për Ozzy Osbourne.
Reputacioni i tij si “një njeri i egër e i çmendur,” shtoi ai, nuk e zbeh faktin që “kishte një zemër prej ari të pastër.”
“Shumica e sjelljeve të tij famëkeqe — saga me lakuriqin, kafshimi i kokës së pëllumbit, urinimi në Alamo, thithja e vijave me milingona dhe të tjera, ndodhën gjatë viteve të tij solo, larg kufizimeve të grupit,” tha Terence Butler. “Por nëse ishe një mik në nevojë, Ozzy gjithmonë ishte aty për ty”, shtoi ai.
Kur djali i tij lindi me një defekt në zemër, Ozzy e telefononte çdo ditë për ta pyetur si po përballoja gjithçka, edhe pse nuk kishin folur për një vit.
“Askush nuk e dinte që do të na linte pak më shumë se dy javë pas atij koncerti të fundit. Por jam kaq mirënjohës që patëm mundësinë të luanim për herë të fundit së bashku përballë fansave të tij të dashur,” shkroi basisti. “Dashuria nga fansat, të gjitha grupet, muzikantët, këngëtarët dhe artistët solo atë natë ishte e pabesueshme. Të gjithë kishin ardhur për të nderuar “princin”. Jam me fat që kam kaluar pjesën më të madhe të jetës sime me të,” vazhdoi ai.
“Sigurisht, do të ketë miliona gjëra që do të më vijnë ndër mend që duhet t’i kisha shkruar, por si mund të përmbledh 57 vite miqësi të pabesueshme në disa paragrafë? Zoti të bekoftë, Oz, ka qenë një udhëtim i pabesueshëm! Të dua!”, përfundoi ai.
Të tre anëtarët e tjerë të Black Sabbath ndanë homazhe prekëse pas vdekjes së tij. Tony Iommi shkroi: “Është një lajm aq tronditës sa nuk gjej fjalët... nuk do të ketë kurrë një tjetër si ai.”
Ndërsa Bill Ward shkroi ndër të tjera: “Ku do të të gjej tani? Në kujtime, përqafimet tona të pashprehura, telefonatat e humbura... jo, ti je përgjithmonë në zemrën time”.
Ylli i heavy metal-it, Ozzy Osbourne, ndërroi jetë në moshën 76-vjeçare më 22 korrik, pak javë pasi u ribashkua me Black Sabbath dhe dha një koncert të madh lamtumire për fansat.
Familja e tij lajmëroi: "Me trishtim të madh njoftojmë se Ozzy na la këtë mëngjes, i rrethuar nga dashuria e familjes”.
Ai vuante nga Parkinsoni dhe kishte pasur probleme shëndetësore vitet e fundit. Koncerti në Villa Park ishte lamtumira e tij për fansat.
Osbourne u nderua me shumë çmime gjatë jetës së tij, përfshirë 5 çmime Grammy dhe vend në Rock and Roll Hall of Fame, si pjesë e Black Sabbath dhe artist solo.
Ai la pas gruan Sharon, fëmijët Aimee, Kelly, Jack, dhe dy fëmijët e parë Jessica e Louis, si dhe nipërit dhe mbesat.
-
-
Ndërron jetë legjenda e heavy metal, Ozzy Osbourne
22 Korrik, 20:26 -
