Punësimi mbi bazën e personalitetit mund të jetë më efektiv sesa mendojmë. Madje edhe NASA e ka aplikuar këtë metodë. Teksa nisi të fokusojë më shumë vëmendjen te profilin psikologjik në përzgjedhjen e astronautëve, NASA zbuloi diçka interesante: një lidhje mes aftësive të njerëzve dhe një element që shumica prej nesh e anashkalon, mënyra se si qeshim. Rezulton se e qeshura e dikujt lidhet drejtpërdrejt me nivelin e tij/saj të inteligjencës emocionale.
E qeshura e dikujt mund të tregojë nivelin e inteligjencës emocionale, sipas NASA-s.
Detajet janë përshkruar në librin e gazetarit Charles Duhigg, "Supercommunicators: How to Unlock the Secret Language of Connection", i cili trajton mënyrën sesi aftësitë komunikuese ndikojnë në çdo aspekt të jetës sonë.
Në libër, Duhigg përmend një zbulim interesant nga NASA në vitet ’80. Astronautët shpesh ndiheshin të dëshpëruar dhe përfshiheshin në debate gjatë misioneve. Me fillimin e projektit për Stacionin Ndërkombëtar Hapësinor, kjo u bë një problem serioz, ata do të qëndronin për muaj të tërë në hapësirë, në kushte të pazakonta dhe stresuese. Nuk kishte vend për tensione të panevojshme.
Kështu që NASA filloi të kërkonte astronautë që jo vetëm ishin fizikisht të përgatitur dhe shkencëtarë të kalibrit të lartë, por edhe me personalitet të qëndrueshëm dhe të përshtatshëm për marrëdhënie të ndërlikuara ndërpersonale. Ata rishikuan regjistrimet e intervistave me astronautë të suksesshëm , dhe një model filloi të bëhej i dukshëm.
NASA zbuloi se astronautët që pasqyronin të qeshurën e intervistuesit kishin nivelin më të lartë të inteligjencës emocionale.
Të gjithë kemi qenë në situata kur ne po qeshnim me lot dhe të tjerët thjesht po buzëqeshnin, ose anasjelltas. Ndonjëherë është çështje humori, por shpesh është diçka më e thellë. Njerëzit me inteligjencë të lartë emocionale kanë tendencën të pasqyrojnë të qeshurat e të tjerëve, një formë e "pasqyrimit emocional".
Nëse dikush po qesh me gjithë shpirt për diçka që s’është domosdoshmërisht shumë qesharake, ne shpesh qeshim bashkë me ta, jo për atë që u tha, por për mënyrën si ata po reagojnë. Kjo është një formë lidhjeje emocionale, dhe NASA e pa këtë si shenjë kyçe për suksesin në skuadër.
Kur ata krahasuan këto veçori me suksesin e astronautëve në mision, u vu re një lidhje e qartë: ata që përshtateshin më mirë me energjinë dhe të qeshurat e intervistuesit, shkëlqenin edhe gjatë detyrave të vështira, sepse kishin aftësi më të mira për të ndërtuar marrëdhënie dhe për të përballuar stresin së bashku me kolegët e tyre.
Ndaj, mos harroni: qeshni, sidomos në intervista pune. ;)
-
Pra, ky veprim qenka çelësi për një marrëdhënie më të fortë!
13 Tetor, 12:51
