Jo se vërtet, a s’u është dukur ndonjëherë e çuditshme? Njeh dikë që s’e ke takuar kurrë më parë, i kushton orë e ditë të tëra atij njeriu dhe gradualisht, ky njeri që ti më parë s’e ke takuar kurrë, që s’është as mami as babi dhe as shoku i fëmijërisë, të pushton jetën dhe merr edhe nga paratë e tua.

Kjo është quajtur “mrekullia që bën dashuria”, por jo për Arjan Konomin. Arjan Konomi është gazetar, opinionist në emisionet televizive dhe përfundimisht, një njeri shumë praktik. Ai s’pranon të ndajë jetën dhe pasurinë me dikë që s’e ka njohur kurrë më parë. Thjesht s’i duket e arsyeshme.

Gjatë një diskutimi për dasmat tek “Top Show” dje, Hueyda El Saied, mikeshë e Konomit, tregoi se kur një dëshmitare e Jehovait e kishte pyetur atë pse nuk martohet, ai i ishte përgjigjur thjesht:

“Sepse nuk dua të fus në shtëpi një të panjohur që të më marrë pasurinë.”

Prej kohësh, Arjan Konomi ishte tërhequr nga jeta publike duke shijuar jetën në fshatin Vuno në Vlorë, në një shtëpi të vjetër të familjes, me kopsht me fruta dhe perime. Tani është kthyer në Tiranë dhe pritet të vijë me një projekt të ri.