Klipi më i fundit i këngëtares Enca Haxhia shkaktoi shumë reagime, për shkak të tematikës delikate që trajton, atë të tradhtisë. E ftuar pasditen e sotme te Rudina, Enca tregoi më shumë rreth “Dua”.

“Klipi ka shumë pjesë të nxehta, nuk e mohoj, por kanë qenë në trajtim të fabulës, të historisë. Jam përpjekur të bëj një minifilm, ku ndryshe nga videoklipet e tjera të mos kishte puthje fallco.”

Por realizimi i klipit erotik s’ka qenë fort i thjeshtë për Encën, pasi ishte hera e parë që përballej me skena të tilla, aq më tepër që modelin portugez, Pierluigi Fracassi e njohu vetëm pak orë para xhirimeve.

“Isha shumë e sikletosur. Asnjëherë më parë [shkëmbimi i një puthjeje] nuk kishte ndodhur në kontekstin e një projekti të tillë. Ne gjendeshim në një suitë me ndërkohë 30-40 persona të stafit brena.”

Enca tha se modeli ishte shumë profesionist dhe se e bëri të ndihej shumë mirë gjatë xhirimeve. Përsa i përket mënyrës se si klipi u prit nga publiku, këngëtarja u shpreh:

“Vendosa ta trajtoja këtë temë edhe pse do të kishte shumë peshë, ama doja ta sillja në një këndvështrim tjetër, që në Shqipëri nuk është trajtuar asnjëherë. Pati shumë reagime, masa ose e kritikonte osë më falenderonte. Disa madje më falenderonin që kisha trajtuar historinë e tyre. Prandaj nuk desha të dënoj dikë. Dua që njerëzit të kenë interpretim të lirë, kush jemi ne të gjykojmë, s’dua të jem në vendin që të paragjykoj dikë. Ama sigurisht jam totalisht kundër një personi të tretë në një marrëdhënie dyshe.”

E pyetur se nga ku u frymëzua më së shumti, artistja u përgjigj:

“Nga telenovelat turke, pasi në fillim të vitit rashë një javë në regjim shtrati, gjithë dramacitetin veçanërisht në fund të klipit e kam krijuar nga ato.”