Dashuria dhe sakrificat e një motre për vëllain e saj u trajtuan mbrëmjen e sotme në  programin “Dua të të bëj të lumtur". Kjo ishte historia e Izës dhe Xhuljos, të cilët jeta i kishte provuar me dhimbjen më të madhe. Para dy vitesh, mamaja e tyre ishte ndarë nga jeta si pasojë e një sëmundjeje.

Gjatë kohës që mamaja e tyre luftonte për jetën Iza ishte përkujdesur për vëllain e saj Xhuljon. Sakrificat e Izës kishin qënë të shumta, madje në një moment ajo kishte ndërprerë edhe shkollën për t’i qëndruar pranë atij.

Për t’i treguar Xhuljos se sa i rëndësishëm ishte për të dhe për t’i kthyer sadopak buzëqeshjen, ajo e kishte ftuar në programin “Dua të të bëj të lumtur”.

Iza i premtoi Xhuljos që ajo do t’i qëndronte gjithmonë pranë dhe se ai nuk ishte vetëm pasi kishte atë, babain dhe një ëngjëll që do të kujdesej gjithmonë për të.

Iza i kërkoi atij që të mbante disa premtime, të cilat shkaktuan të qeshura edhe tek publiku. Më pas, erdhi radha e surprizës për Xhuljon, i cili kishte idhull futbollistin e kombëtares, Armando Sadikun.

Pas ardhjes së tij në studio, Armando iu drejtua Xhuljos me këto fjalë: “Ke një motër që të do shumë dhe më ka treguar që të pëlqen shumë futbolli. Duhet të kesh shumë vullnet dhe të stërvitesh përditë që të bëhesh një lojtar i zoti. Për këtë gjë të uroj shumë suksese”.