Dramë? Jo më. Pas pothuajse një dekade plot thumbime, Lady Gaga dhe Madonna kanë tashmë një raport për së mbari; të paktën kështu duket nga postimet e fundit në Instagram.

Fotografi francez JR, në bashkëpunim me TIME, arriti të kapte këtë moment special teksa këngëtaret përqafojnë njëra-tjetrën në festën e organizuar nga menaxheri i talenteve Guy Oseary pas ceremonisë së ndarjes së çmimeve Oscars. "Mos u ngatërroni me vajzat italiane," shkruan Madonna.

Thumbimet e para i përkasin vitit 2009, kur Gaga shpërtheu në muzikë dhe shumë njerëz nisën ta krahasonin me mbretëreshën e pop-it, Madonna-n.

Në vitin 2012, Madonna foli hapur duke u shprehur se kënga e Lady Gaga-s “Born This Way” ngjasonte shumë me hitin e vitit 1989, “Express Yourself” duke u përpjekur të minimizojë figurën e Gaga-s.

Katër vitë me vonë, në një intervistë për Zane Lowe, Gaga u shpreh se “ajo dhe Madonna janë shumë ndryshe”.

“Nuk dua të tregoj mungesë respekti, ajo ka një karrierë fantastike, është ylli më i madh i muzikës pop i të gjitha kohërave. Por unë luaj shumë intrumente, i shkruaj vetë tekstet, qëndroj me orë të tëra në studio. Jam një producente. Jam shkrimtare. Ajo që bëj unë është shumë ndryshe.”

Në dokumentarin e saj “Gaga: Five Foot Two”, ajo shton ndër të tjera:

“Raporti im me Madonna-n është si të thuash...unë e admiroja atë dhe ende e admiroj, pavarësisht se çfarë mendon ajo. Por të shprehej për mua përmes mediave, është si një djalë që më jep një letër dashurie përmes shokut.”

Por siç duken këto “konflikte” i përkasin të kaluarës. Dramat edhe harrohen dhe krijohen miqësi.