Pas tre vitesh mungesë, që prej 2016-s kur u shkëput për t’u përqëndruar te veshjet më sportive, Victoria’s Secret rikthehet me koleksionin e rrobave të banjos: Verë 2019.

Koleksioni përmban një gamë të gjerë ngjyrash, nuancash, printesh dhe dizenjosh ndërkohë çmimet shkojnë nga 42 deri në 518 dollarë.

Fill pas publikimit, nuk qenë të paktë njerëzit që shpërthyen me komente në Twitter duke kritikuar Victoria’s Secret për dy arsye.

Së pari, çmimet janë shumë më të shtrenjta seç pritej. “Jam shumë e lumtur që Victoria’s Secret u rikthye me një linjë rroba banjosh, por mesa duket nuk paskan menduar fare për çmimet,” shkruan dikush.

Së dyti, ndjekësit vunë re se mungojnë modelet e kolme. “Isha shumë e lumtur për rikthimin e Victoria’s Secret, por gjoksi im nuk i përket masës XS, S, M dhe L”.

“Victoria’s Secret ka gjithë potencialin për të bërë gjërat e duhura. Është shumë e thjeshtë: bëj një fushatë për gratë e kolme duke përdorur modele plus size, sillni produkte për të gjitha moshat.” – shtoi një tjetër.

Nuk është hera e parë që marka përballet me të tilla kritika në lidhje me imazhin e gabuar të trupit, duke qenë se të gjitha modelet i përkasin masave të vogla. Gjithnjë e më tepër, njerëz të famshëm ose jo po ngrejnë zërin për diversitetin në modë në mënyrë që të mos bëhen paragjykime dhe të rrëzohen njëherë e mirë disa standarde të së kaluarës.