Gjatë intervistës së fundit, Jimmy Kimmel guxoi duke e pyetur Khloe Kardashian: “A nuk mendon se ka ardhur koha që të mos lidhesh më me basketbollistë?".
Ndonëse pyetja është paksa e pasjellshme, Kimmel u bazua në historitë e së kaluarës. Në 2015-n, Khloe u nda nga ylli i NBA, James Harden. Martesa e saj me Lamar Odom përfundoi në divorc në vitin 2016, dy vite pas ndarjes. Së fundmi, ajo i dha fund lidhjes me Tristan Thompson të skuadrës Cleveland Cavalier, i cili e tradhtoi fillimisht në prill të 2018-s për t’i dhënë fund marrëdhënies pas skandalit me shoqen e ngushtë të Kylie-t, Jordyn Woods.
Duhet thënë se në internet, fill pasi ngjarja u bë publike, nuk munguan reagimet e tipit: “Më vjen keq për Khloe-n, por ç’priste ajo? Ai është një sportist i NBA?”.
(NBA – The National Basketball Association – Shoqata Ndërkombëtare e Basketbollit, një ligë profesionale e basketbollit për meshkuj në Amerikën e Veriut).
Njerëzit i referohen të gjitha skandaleve të tradhtisë së yjeve të NBA: Paul George, Raymond Felton, Dwyane Wade, Lamar Odom, Kobe Bryant, LeBron James, Tony Parker, Daniel Gibson, Shaquiell O’Neal, Steve Nash, Matt Barnes, Michael Jordan, Charles Barkley, Stephon Marbury, Wndrei Kirilenko, Tristan Thompson etj.
Pra, përgjithësisht është krijuar ideja se nëse martohesh me një basketbollist, në këtë rast me një lojtar të NBA, është e pamundur që të mos tradhtohesh. Thuhet se është e pritshme që ai nuk do të jetë besnik.
Detaje si trupi i formuar, vëmendja e mediave, paratë dhe jo vetëm, i shtyjnë sportistët të dëshirojnë praninë e shumë grave në jetën e tyre. Pra, mund të kenë çdo pjesë të tortës...të paktën sipas stereotipit të krijuar për ta.
Gjithë reagimi nxiti Kareem Abdul-Jabbar, autor i librit bestseller në New York Times “Becoming Kareem: Growing Up On and Off the Court” të shkruante një ese për Cosmopolitan duke treguar se stereotipet e padrejta kundër sportistëve (dhe sidomos basketbollistëve) nxisin paragjykime kulturore në përgjithësi.
“Imagjinoni sikur të gjithë të kishim thënë: ’Pritej që ai të tradhtonte, se është me ngjyrë’, njerëzit do të ishin acaruar. Por sportistët priren t’i pranojnë këto stereotipe fyese, ta mbyllin gojën dhe të vazhdojnë të luajnë.” – thekson Kareem Abdul-Jabbar.
Ndër të tjera, ai ndalet tek një studim i Institutit për Studime Familjare në SH.B.A, në të cilin thuhet se gratë e martuara nga mosha 18-29 vjeç kanë më shumë gjasa të tradhtojnë partnerët e tyre. Pra, a na e jep kjo të drejtën t’i karakterizojmë gratë e kësaj moshe si mashtruese dhe tradhtare? Jo.
“Është e kuptueshme që fansat e familjes Kardashian janë të inatosur me Tristan. Por do të ishte më e përshtatshme që ta ‘dënojnë’ si njeri, jo si përfaqësues të një komuniteti sportiv. Nëse ndjejnë nevojën ta dënojnë, le ta bëjnë bazuar tek sjellja e tij, jo profesioni apo gjinia.”
