Për Estela Ujkën, veshjet më të shtrenjta jo domosdoshmërisht lidhen me çmimin. Nëse ka qenë okazion, ka qenë e fundit ose ka qenë pjesë e një koleksioni të limituar, për blogeren është automatikisht një veshje e shtrenjtë. “Jo gjithmonë të shtrenjtën e lidh me çmimin,” u shpreh ajo në një intervistë për “Mos i fol shoferit”.

“Për mua, veshjet e pazëvendësueshme janë më të shtrenjtat,” shtoi më pas. “Por nëse flasim për vlerë monetare, nuk kam blerë asgjë më shumë se 500 euro.”

Po veshja më e lirë? Blogerja nuk hezitoi sërish të përmendte shifra dhe tregoi se fustani më i lirë është pikërisht ai që mbante veshur gjatë intervistës; një fustan i bardhë me pika të zeza. Vetëm 220 lekë. “E vesha posaçërisht për të të thënë që jo gjithmonë çmimi bën diferencën.”

Në vijim, blogerja shtoi se “ka blerë në dyqane second-hand” (rroba të përdorura). “Si të gjithë shqiptarët, kam blerë në dyqane second-hand dhe jo në variantin second-hand [si sot], por te gabi. Ne jemi brezi që nuk kishim second-hand, kishim thjesht gabi.”