Pas publikimit të dokumentarit “Framing Britney Spears”, njerëzit kanë reflektuar në lidhje me trajtimin abuziv të mediave ndaj grave të reja në Hollyëood dhe kanë kuptuar që fatkeqësisht, Britney nuk ishte viktima e vetme. Ashtu si Spears, Lindsay Lohan gjithashtu u trajua jo në mënyrën e duhur nëpër media mbi përpjekjet e saj personale. Një video e vitit 2013 po bëhet virale për të provuar pikërisht këtë.

Redaktori i revistës The Face, Trey Taylor, publikoi në Twitter një moment nga intervista e Lindsay Lohan me moderatorin David Letterman në vitin 2013. “Kjo intervistë e Lindsay Lohan me David Letterman në 2013 është e tmerrshme për t’u parë,” shkroi ai.

Lindsay Lohan, me një historik abuzimi dhe varësie me alkoolin dhe substanca të ndryshme, shoqëruar me arrestime të herëpashershme për kundravajtje penale, në atë periudhë duhej të qëndronte 90 ditë në një qendër rehabilitimi për të shmangur qëndrimin në burg për dy dënime të mëparshme. Përpos kësaj, ajo po promovonte filmin “Scary Movie 5” dhe u paraqit në “Late Show”.

Gjatë intervistës, Letterman e pyeti yllin e “Mean Girls” për betejën me abuzimin me substancat duke thënë, “A nuk duhet të jesh në rehabilitim tani?”.

Aktorja u përgjigj se po afrohej data, por Letterman vazhdoi me një seri pyetjesh: Për sa kohë do të jesh në rehabilitim? Sa herë ke qenë në rehabilitim? Për çfarë po të rehabilitojnë? Çfarë do të të bëjnë kur të shkosh atje?

“Ne nuk e diskutuam këtë në intervistën paraprake,” tha Lindsay, përpara se të përgjigjej. “Mendoj, të jem e sinqertë, që jam më e lumtur kur punoj dhe më e shëndetshme dhe mendoj se kjo është një mundësi për mua për t’u përqendruar në atë që dua dhe nuk mendoj se është një gjë e keqe. Mendoj se është një bekim”.

Sërish, Letterman e pyeti se për çfarë substance po trajtohej.

“Nuk mund të bësh shaka me këtë. Është kaq [gjë] e keqe,” tha aktorja.

Në Twitter, njerëzit kritikojnë Letterman për stigmën e varësisë dhe disa theksojnë se sjellja e tij është “e poshtër”. Të tjerë, vlerësojnë Lindsay-n për qëndrimin, pavarësisht bisedës së vështirë.