Një vit më parë, gjatë një konference mediatike Organizata Botërore e Shëndetësisë (OBSH) deklaroi se Covid-19 ishte një pandemi. Disa thonë se deklarata erdhi shumë vonë, një pararendëse e kaosit dhe vështirësive që do të vijonin gjatë gjithë vitit të ardhshëm, ku gjysma e njerëzimit u përball me kufizime vetëm një muaj më vonë.
"Në fillim të janarit, ne e dinim se kjo ishte një pandemi dhe shumë prej nesh po e thonim atë publikisht. Në momentin që pamë që virusi po përhapej në të gjithë Azinë Lindore, Azinë Juglindore dhe në Lindjen e Mesme, brenda disa javëve nga zbulimi i parë, duhet ta kishim deklaruar atë si një virus pandemik. Ne nuk e bëmë; bota nuk e bëri dhe kjo për mua ishte fillimi i mosveprimit si përgjigje,” tha për Euronews Michael Mina, një asistent profesor i epidemiologjisë në Universitetin e Harvardit T.H., Shkolla e Shëndetit Publik Chan.
Në kohën kur Covid u shpall pandemi marsin e kaluar, kishte më shumë se 118,000 raste të konfirmuara të virusit në 114 vende dhe më shumë se 4,000 vdekje. Shumë vende europiane u mbyllën të njëjtën javë mes shtrimeve në rritje në spital.
Pikërisht një vit më vonë, ka më shumë se 117 milionë raste dhe 2.6 milionë vdekje në të gjithë botën, që përfaqëson një rritje prej 99,000% të numrit të infeksioneve.
Por deklarata në 11 mars 2020, ishte pa shumë bujë, me paralajmërimin e drejtorit të përgjithshëm të OBSH, Dr. Tedros Adhanom Ghebreyesus, se ata nuk e përdorin lehtë fjalën "pandemi".
“Pandemi nuk përdoret me moskokëçarje. Si fjalë, nëse keqpërdoret, mund të shkaktojë frikë, pranimin e gabuar se s’kemi pse luftojmë më dhe sjell vuajtje dhe vdekje të panevojshme. Duke e përshkruar situatën si pandemike, OBSH nuk ndryshon vlerësimin e rrezikut për këtë koronavirus. Nuk ndryshon planin e punës dhe nuk ndryshon masat e ndërmarra nga shtetet.”
Tani, shumë ekspertë kanë thënë që kjo është pandemia më e keqe e shekullit, pasi ka përmbysur jetën e njerëzve globalisht dhe kanë bërë krahasime me pandeminë e gripit spanjoll në vitin 1918, përgjegjëse për dhjetëra miliona vdekje.
Pandemitë nuk ndikohen nga ashpërsia e sëmundjes, por nga përhapja gjeografike. Sipas OBSH-së, një sëmundje e re quhet pandemike kur njerëzit e prekur në gjithë botën nuk kanë mbrojtje imunitare.
Ka pasur kritika ndaj OBSH-së për deklarimin e emergjencës shëndetësore. Një komitet i OBSH-së u mblodh në 22 janar 2020 dhe vendosi të mos deklarojë Urgjencë të Shëndetit Publik të Shqetësimit Ndërkombëtar, por e ndryshoi vendimin një javë më vonë kur situata evoloi me shpejtësi.
Të tjerë ekspertë kanë kritikuar qeveritë për mungesën e përgatitjes pas deklaratës së OBSH-së për Covid-19 si urgjencë globale shëndetësore.
Burimet: OBSH, Euronews, Guardian
