A keni komunikuar ndonjëherë me dikë që duket se ndihet sikur është një “perëndi mes njerëzve”? Njerëz të tillë ndonjëherë përshkruhen se kanë "kompleksin e Zotit". Ky term nuk është një diagnozë e mirëfilltë apo një term klinik, por përdoret shpeshherë dhe ka disa shenja treguese.

Çfarë do të thotë që dikush të ketë “kompleksin e Zotit”? E thënë thjesht, do të thotë që mbivlerëson veten, aftësitë dhe të drejtat që ka në krahasim me të tjerët. Një person me këtë kompleks mendon se është më i zgjuari, më i mirë, realiteti i tij është realiteti, përvoja e tij është përvoja në përgjithësi etj.

Këta njerëz priren të shfaqin arrogancë në ekstrem duke respektuar fare pak ose aspak të tjerët dhe justifikojnë veprimet që bëjnë.

A janë narcistë? Nuk janë fort të ndryshëm, kanë tipare të përbashkëta. Shpesh kur njerëzit përshkruajnë dikë me kompleksin e Zotit i referohen dikujt që mund të ketë tipare të çrregullimit narcisist të personalitetit.

Të kesh një kompleks të tillë nuk është një gjendje e diagnostikueshme (domethënë, nuk është një gjendje e shënuar në Manualin Diagnostikues dhe Statistikor të Çrregullimeve Mendore), por çrregullimi narcisist i personalitetit (NPD) është. Dikush i diagnostikuar me NPD me siguri do të shfaqë disa shenja të kompleksit të Zotit, por dikush me kompleksin e Zotit nuk ka domosdoshmërisht NPD.

 Në disa raste, psikologët e përshkruajnë si një lloj të veçantë narcisizmi.

Disa shenja të zakonshme

1. Mburren dhe kanë ndjenja të madhështisë për veten. Ata mendojnë që janë më të rëndësishmit.

2. Manipulimi – mund të mohojnë realitetin e dikujt tjetër sepse u intereson vetëm vetja.

3. Mungesa e ndjeshmërisë – sjellje e ashpër dhe pa emocione.

4. Sjelljet e papërfillshme – ata nuk mendojnë se lëndojnë të tjerët. Sipas tyre, nuk bëjnë asgjë të keqe.

5. Ndjenja e tepruar për admirim dhe lavdërim.

6. Marrëdhënie të pasuksesshme afatgjata.

7. Mosrespektimi i kufijve – ata besojnë se gjithçka u përket atyre, të gjithë mendojnë dhe ndihen njësoj si ata, dhe të gjithë duan të njëjtat gjëra që ata bëjnë.

8. Mungesa e përgjegjësisë – këta individë mendojnë që gjithçka që bëjnë është e duhur dhe nuk bien dakord që duhet të ndryshojnë.

9. Mund të kenë çrregullime të personalitetit dhe gjendje të tjera mendore.

Burime: Healthline, Mind Body Green